Read Bhaibheri Dzvene MuChiShona Chanhasi Jobho 34 Bible Online

Jobho 34 - Bhaibheri Dzvene MuChiShona Chanhasi bible

Jobho 34

¹Ipapo Erihu akati:

²“Inzwai mashoko angu, imi vanhu vakachenjera; nditeererei, imi vanhu vedzidzo.

³Nokuti nzeve inoedza mazwi sokuravira kunoita rurimi chokudya.

⁴Ngatinzverei pachedu kuti chakarurama ndechipi; ngatidzidzei pamwe chete kuti chakanaka ndechipi.

⁵“Jobho anoti, ‘Handina mhosva, asi Mwari anoramba kundiruramisira.

⁶Kunyange ndakarurama, ndinonzi ndiri murevi wenhema; kunyange ndisina mhaka, museve wake unobaya ronda risingarapiki.’

⁷Ndianiko munhu akaita saJobho, anonwa kushorwa semvura?

⁸Anofambidzana navanoita zvakaipa; anowirirana navanhu vakaipa.

⁹Nokuti anoti, ‘Munhu haana chaanobatsirwa nacho, paanoedza kufadza Mwari.’

¹⁰“Saka nditeererei, imi vanhu vokunzwisisa. Mwari haangatongoiti zvakaipa, Wamasimba Ose haangatongokanganisi.

¹¹Anoripira munhu pane zvaanenge aita; anoisa pamusoro pake zvakakodzera mafambiro ake.

¹²Hazvingatongogoni kuti Mwari angaita zvakaipa, kuti Wamasimba Ose angaminamisa kururamisira.

¹³Ndianiko akamugadza pamusoro penyika? Ndianiko akamuita mutariri wepasi pose?

¹⁴Kana kwaiva kufunga kwake, uye akatora mweya wake nokufema kwake,

¹⁵marudzi ose avanhu aiparara pamwe chete, uye munhu aizodzokerazve kuguruva.

¹⁶“Kana uchinzwisisa teerera izvi; chinzwa zvandinoreva.

¹⁷Ko, munhu anovenga kururamisira angatonga here? Ko, muchapomera akarurama uye ane simba here?

¹⁸Ko, haazi iye anoti kumadzimambo, ‘Hamubatsiri imi,’ uye kumakurukota, ‘Makaipa imi,’

¹⁹asingaitiri machinda zvakanaka nokuti machinda, uye asingaitiri zvakanaka vapfumi kupfuura varombo, nokuti vose ibasa ramaoko ake?

²⁰Vanofa kamwe kamwe, pakati pousiku; vanhu vanovhundutswa vagoparara; vane simba vanobviswa zvisingaitwi noruoko rwomunhu.

²¹“Meso ake ari panzira dzavanhu; anoona nhambwe imwe neimwe yavo.

²²Hakuna nzvimbo ine rima, hakuna mumvuri wakadzama, pangavanda vaiti vezvakaipa.

²³Mwari haanei nezvokuedzazve vanhu, kuti vauye vamire pamberi pake vagotongwa.

²⁴Anoparadza vane simba asina kumbobvunza, agogadza vamwe panzvimbo yavo.

²⁵Nokuti anocherechedza mabasa avo, anovabvisa usiku uye vanopwanyiwa.

²⁶Anovaranga nokuda kwokuipa kwavo, pavanoonekwa nomunhu wose,

²⁷nokuti vakatsauka pakumutevera uye havana kuva nehanya kana neimwe yenzira dzake.

²⁸Vakakonzera kuchema kwavarombo kuti kusvike pamberi pake, zvokuti akanzwa kuchema kwavanoshayiwa.

²⁹Asi kana akaramba anyerere ndiani angamupa mhosva? Kana akavanza chiso chake, ndianiko angamuona? Zvakadaro iye ari pamusoro pazvose, munhu nendudzi,

³⁰kuti abvise munhu asina umwari pakutonga, kuti asaisira vanhu misungo.

³¹“Ngatiti munhu oti kuna Mwari, ‘Ndine mhaka asi handichatadzazve.

³²Ndidzidzisei zvandisingagoni kuona; kana ndakaita zvakaipa, handichazviitizve.’

³³Ko, Mwari angafanira kukupa mubayiro sezvaunoda iwe here, zvaunoramba kutendeuka? Unofanira kusarudza iwe, kwete ini; saka nditaurire zvaunoziva.

³⁴“Imi vanhu vokunzwisisa taurai, vanhu vakachenjera munondinzwa muti kwandiri,

³⁵‘Jobho anotaura asina zivo; mashoko ake haana uchenjeri.’

³⁶Haiwa, dai Jobho aedzwa kusvikira pakupedzisira, nokuti anopindura somunhu akaipa!

³⁷Pachivi chake anowedzera kumukira; anouchira maoko ake pakati pedu sezvisina basa, uye anowedzera mashoko ake okurwa naMwari.”