Read Bhaibheri Dzvene MuChiShona Chanhasi Jobho 35 Bible Online

Jobho 35 - Bhaibheri Dzvene MuChiShona Chanhasi bible

Jobho 35

¹Ipapo Erihu akati:

²“Unofunga kuti izvi zvakarurama here? Iwe zvaunoti, ‘Ndichanzi ndakarurama naMwari.’

³Kunyange zvakadaro unomubvunza uchiti, ‘Zvinondibatsirei, uye ndinowaneiko nokusatadza.’

⁴“Ndinoda kupindura iwe neshamwari dzako dzaunadzo.

⁵Tarira kumatenga uone; nanʼanidza makore ari pamusoro pako.

⁶Kana ukatadza, zvinomurwadza zvakadiniko? Kana zvivi zvako zvikawanda, zvinoita sei kwaari?

⁷Kana wakarurama, unomupeiko iye, kana kuti anogamuchireiko kubva muruoko rwako?

⁸Kuipa kwako kunongobata munhu akaita sewe, uye kururama kwako ndekwomwanakomana wavanhu chete.

⁹“Vanhu vanoridza mhere vari pasi pomutoro wokumanikidzwa; vanokumbira kusunungurwa kubva muruoko rwoune simba.

¹⁰Asi hakuna munhu anoti, ‘Aripiko Mwari Muiti wangu, anopa nziyo panguva yousiku,

¹¹anodzidzisa zvakawanda kwatiri kupfuura mhuka dzenyika uye anotiita vakachenjera kupfuura shiri dzedenga.’

¹²Haapinduri kana vanhu vachiridza mhere, nokuda kwokuzvikudza kwavakaipa.

¹³Zvirokwazvo, Mwari haateereri chikumbiro chavo chisina maturo; Wamasimba Ose haazviteereri izvozvo.

¹⁴Ndoda, zvino, haangateereri kana uchiti hausi kumuona, mhaka yako iri pamberi pake zvokuti unofanira kumumirira,

¹⁵uyezve, kuti kutsamwa kwake hakumborangi, uye haana hanya zvake nezvakaipa.

¹⁶Saka Jobho anoshamisa muromo wake achitaura zvisina maturo; anowanza mashoko ake asina zivo.”