Read Bhaibheri Dzvene MuChiShona Chanhasi Jobho 36 Bible Online

Jobho 36 - Bhaibheri Dzvene MuChiShona Chanhasi bible

Jobho 36

¹Erihu akaenderera mberi achiti:

²“Imbondiitirai mwoyo murefu kwechimwezve chinguva, ipapo ndichakuratidzai kuti pane zvimwe zvakawanda zvokutaura, ndakamiririra Mwari.

³Ruzivo rwangu runobva kure; ndichati Muiti wangu akarurama.

⁴Muzive kuti mashoko angu haasi enhema; akakwana pazivo ari pakati penyu.

⁵“Mwari ane simba asi haazvidzi vanhu; ane simba, uye anozadzisa zvaakaronga.

⁶Haaregi vakaipa vari vapenyu, asi anopa vanotambudzika kodzero dzavo.

⁷Haabvisi meso ake pane vakarurama; anovagadza pamwe chete namadzimambo uye anovasimudzira nokusingaperi.

⁸Asi kana vanhu vakasungwa nengetani, vakabatwa zvakasimba netambo dzokutambudzika,

⁹iye anovaudza zvavanenge vaita, kuti vatadza nokuzvikudza zvikuru.

¹⁰Anovaita kuti vateerere kurayirwa, uye anovarayira kuti vatendeuke pane zvakaipa zvavo.

¹¹Kana vakateerera uye vakamushumira, vachapedza mazuva avo ose mukubudirira uye makore avo vari mukugutsikana.

¹²Asi kana vasingateereri, vachapera nomunondo, uye vachafa vasina zivo.

¹³“Vasina umwari mumwoyo yavo vanochengeta pfundipfundi, kunyange paanovasunga, havaridzi mhere kuti vabatsirwe.

¹⁴Vanofa panguva yeujaya hwavo, pakati pezvifeve zvechirume zvepashongwe.

¹⁵Asi vaya vanotambudzika anovarwira pakutambudzika kwavo; anotaura kwavari panguva yokurwadziwa kwavo.

¹⁶“Ari kukukwezva kubva pamuromo wenhamo, kuti akuise panzvimbo yakasununguka isina zvipinganidzo, pazvivaraidzo zvetafura yenyu izere nezvokudya zvakaisvonaka.

¹⁷Asi zvino waremedzwa nokutonga kwakafanira vakaipa; kutonga uye kururamisira zvakubata iwe.

¹⁸Uchenjere kuti parege kuva nomunhu anokunyengera nepfuma; usarega fufuro huru ichikutsausa.

¹⁹Ko, pfuma yako kana kushingaira kwesimba rako zvingakutsigira kuti urege kutambudzika here?

²⁰Rega kushuva usiku, kuti ukwekweredzere vanhu kure nemisha yavo.

²¹Chenjera kuti urege kudzokera kune zvakaipa, izvo zvaunoda pachinzvimbo chokutambudzika.

²²“Tarira, Mwari anosimudzirwa musimba rake. Ndianiko mudzidzisi akafanana naye?

²³Ndianiko akamuratidza nzira dzake, kana akati kwaari, ‘Makanganisa imi?’

²⁴Rangarira kukudza basa rake, iro rakarumbidzwa navanhu munziyo.

²⁵Marudzi ose avanhu akariona; vanhu vanoritarisa vari kure.

²⁶Haiwa, Mwari mukuru kupfuura kunzwisisa kwedu! Kuwanda kwamakore ake hakuverengeki.

²⁷“Anokwevera madonhwe emvura kumusoro, anoshanduka achinaya semvura kuhova;

²⁸makore anodurura unyoro hwawo uye mvura yakawanda inonaya pamusoro pavanhu.

²⁹Ndianiko anganzwisisa kuparadzira kwaanoita makore, namatinhiriro aanoita ari mudenga rake?

³⁰Tarirai maparadziro aanoita mheni yake pamativi ake, ichituhwina makadzika megungwa.

³¹Ndiyo nzira yaanotonga nayo ndudzi neyaanodziriritira nayo nezvokudya zvakawanda.

³²Anozadza maoko ake nemheni agorayira kuti irove paanoda.

³³Kutinhira kwake kunozivisa dutu remvura riri kuuya; kunyange mombe dzinoratidza kusvika kwaro.