Read Bhaibheri Dzvene MuChiShona Chanhasi Jobho 37 Bible Online

Jobho 37 - Bhaibheri Dzvene MuChiShona Chanhasi bible

Jobho 37

¹“Hana yangu inorova nokuda kwezvizvi, uye mwoyo wangu unotomuka uchibva panzvimbo yawo.

²Teererai! Teererai kutinhira kwenzwi rake, nokuunga kunobva pamuromo wake.

³Anoregedzera mheni yake pasi pedenga rose, agoituma kumigumo yenyika.

⁴Shure kwaizvozvo inzwi rokutinhira kwake rinosvika; anotinhira nenzwi roumambo hwake.

⁵Inzwi raMwari rinotinhira nenzira dzinoshamisa; iye anoita zvinhu zvikuru zvinopfuura kunzwisisa kwedu.

⁶Anoti kuchando, ‘Donhera panyika,’ nokumvura inonaya, ‘Naya nesimba.’

⁷Kuitira kuti vanhu vose vaakasika vazive basa rake, anoita kuti munhu mumwe nomumwe ambomira kushanda.

⁸Mhuka dzinovanda; dzinoramba dziri mumapako adzo.

⁹Dutu rinobuda pakamuri yaro, chando chinobva pakuvhuvhuta kwemhepo.

¹⁰Kufema kwaMwari kunobudisa mazaya echando, uye mvura zhinji inooma kuita chando.

¹¹Anozadza makore nounyoro; anoparadzira mheni yake nomumakore.

¹²Anoafambisa sezvaanoda pamusoro penyika yose, kuti aite zvose zvaanoarayira.

¹³Anouyisa makore kuzoranga vanhu, kana kuzodiridza nyika yake kuti aratidze rudo rwake.

¹⁴“Teerera izvi, Jobho; imbomira ugorangarira zvishamiso zvaMwari.

¹⁵Unoziva here kudzorwa kwamakore naMwari nokupenyesa kwaanoita mheni yake?

¹⁶Unoziva maturikirwo akaitwa makore here, izvo zvishamiso zvaiye akakwana muruzivo?

¹⁷Iyewe unopiswa nenguo dzako nyika painonyaradzwa nemhepo yezasi,

¹⁸ko, ungagona kubatana naye pakutatamura matenga here, iwo akaoma kunge chionioni chendarira yakaumbwa.

¹⁹“Tiudze zvatingareva kwaari; hatigoni kureva mhaka yedu nokuda kwerima redu.

²⁰Ko, anofanira kuudzwa kuti ndinoda kutaura here? Ko, pano munhu angakumbira kumedzwa here?

²¹Zvino hakuna munhu angatarira kuzuva, nokuvhenekera kwaro riri mumatenga, mushure mokunge mhepo yaachenesa.

²²Anouya nokubwinya kunoyevedza achibva nokumusoro; Mwari anouya nokubwinya kunotyisa.

²³Wamasimba Ose haasvikiki kwaari uye anokudzwa nesimba; mukururamisira uye nokururama kwake kukuru haadzvinyiriri.

²⁴Naizvozvo, vanhu vanomutya, ko, haana hanya navose vakachenjera pamwoyo here?”