Read Bhaibheri Dzvene MuChiShona Chanhasi Jobho 38 Bible Online

Jobho 38 - Bhaibheri Dzvene MuChiShona Chanhasi bible

Jobho 38

¹Ipapo Jehovha akapindura Jobho ari mudutu akati:

²“Ndianiko uyu anodzimaidza zano rangu namashoko asina zivo?

³Chizvishingisa somurume; ini ndichakubvunza, uye iwe uchandipindura.

⁴“Iwe wakanga uripi pandakaisa nheyo dzenyika? Ndiudze, kana uchinzwisisa.

⁵Ndianiko akatara miganhu yacho? Zvirokwazvo unozviziva! Ndianiko akaiyera nerwodzi?

⁶Ko, nheyo dzayo dzakanga dzimire pai, kana kuti ndianiko akaisa ibwe rapakona,

⁷panguva yaiimba nyeredzi dzamangwanani pamwe chete, uye vanakomana vaMwari vose vachipembera nomufaro?

⁸“Ndianiko akapfigira gungwa mikova parakatsemuka richibva muchizvaro,

⁹pandakaita makore kuti ave nguo yaro, uye ndikariputira murima guru,

¹⁰pandakariisira miganhu yaro, uye ndikaisa makonhi aro namazariro panzvimbo yawo,

¹¹pandakati, ‘Apa ndipo paunosvika uye haungapfuuri; pano ndipo panoguma kuzvikudza kwamafungu ako’?

¹²“Wakambopa mutemo kumangwanani here, kana kuratidza mambakwedza nzvimbo yawo,

¹³kuti abate mipendero yenyika, uye azungunuse vakaipa kuti vabve mairi?

¹⁴Nyika inoumbika sevhu pasi pechisimbiso; mamiriro ayo anoita senguo.

¹⁵Vakaipa vanonyimwa chiedza chavo, uye ruoko rwavo rwakasimudzwa rwavhunika.

¹⁶“Wakamboshanyira zvitubu zvegungwa here, kana kufamba kwakanyarara kwokwakadzika?

¹⁷Ko, masuo orufu wakamboaratidzwa here? Wakamboona masuo omumvuri worufu here?

¹⁸Wati wanzwisisa upamhi hwenzvimbo dzenyika here? Ndiudze kana uchiziva zvose izvi.

¹⁹“Ko, nzira inoenda kunogara chiedza ndeipi? Ko, rima rinogarepi?

²⁰Ungagona kuzviisa kunzvimbo yazvo here? Unoziva nzira inoenda kwazvinogara here?

²¹Zvirokwazvo iwe unoziva, nokuti wakanga waberekwa kare! Wararama kwamakore mazhinji kwazvo.

²²“Wakambopinda mudura rechando here, kana kuona dura rechimvuramabwe,

²³izvo zvandakachengetera nguva dzokutambudzika, mazuva ehondo neokurwa?

²⁴Ko, nzira inoenda kunogoverwa mheni ndeipi, kana nzvimbo inoparadzirwa mhepo dzokumabvazuva pamusoro penyika?

²⁵Ndianiko anodziura mugero wemvura zhinji, nenzira yechimvuramabwe,

²⁶kuti zvidiridze nyika isingagarwi nomunhu, gwenga risina munhu mariri,

²⁷kugutsa nyika yakaparadzwa nokuita kuti imere uswa?

²⁸Ko, mvura ina baba here? Ndianiko baba vemadonhwe edova?

²⁹Chando chinobva muchizvaro chaaniko? Ndianiko anobereka mazaya echando achibva kudenga,

³⁰panooma mvura ikaita sedombo, pamusoro pokwakadzika pachioma nechando?

³¹“Ungagona kusunga nyeredzi dzeChimutanhatu here? Iwe ungasunungura mabote eOrioni here?

³²Ungabudisa mapoka enyeredzi panguva yadzo here, kana kutungamirira Akuturo navana vayo?

³³Unoziva mitemo yokumatenga here? Ungagona kumisa umambo hwaMwari pamusoro penyika here?

³⁴“Ko, iwe ungasvitsa inzwi rako kumakore here, uye ugozvifukidza namafashamu emvura?

³⁵Ko, iwe unotuma mheni panzira yayo here? Ko, zvinodzoka kuzokuzivisa iwe here kuti isu tiri pano?

³⁶Ndianiko akaisa uchenjeri mumwoyo, kana kupa kunzwisisa kundangariro?

³⁷Ndianiko ane uchenjeri hwokuverenga makore? Ndianiko angagona kuteura matende emvura okudenga,

³⁸kana guruva raoma, uye mavhinga enyika anamatirana?

³⁹“Ko, iwe ungavhimira shumbakadzi chokudya here, uye ungagutsa shumba panzara yadzo here,

⁴⁰kana dzichitsivama mumapako adzo kana kuti dzakavandira mudenhere?

⁴¹Ndianiko anopa gunguo zvokudya kana vana varo vachichema kuna Mwari, uye vachidzungaira pose pose nokushayiwa zvokudya?