Read Bhaibheri Dzvene MuChiShona Chanhasi Jobho 39 Bible Online

Jobho 39 - Bhaibheri Dzvene MuChiShona Chanhasi bible

Jobho 39

¹“Iwe unoziva nguva inobereka ngururu here? Unocherechedza kana nondo dzichibereka vana vadzo here?

²Unoverenga mwedzi kusvikira dzabereka here? Unoziva nguva yadzinobereka here?

³Dzinotsivama pasi dzigobereka vana vadzo; kurwadziwa kwadzo kwapera.

⁴Vana vadzo vanowanda vagokura vakasimba musango; vanoenda uye havadzokizve.

⁵“Ndianiko akaregedza mbizi ichienda? Ndianiko akasunungura tambo dzayo?

⁶Ndakaipa renje kuti uve musha wayo, nyika yomunyu sougaro hwayo.

⁷Inoseka bope riri muguta; hainzwi kudaidzira kwomuchairi.

⁸Inoita zvikomo mafuro ayo uye inotsvaka zvinhu zvose zvinenge zvakapfumvudza.

⁹“Ko, nyati ingabvuma kukushandira here? Ko, ingagara mudanga rako usiku here?

¹⁰Ko, ungagona kuifambisa mumiforo namahanisi here? Ko, ingarima mipata mushure mako here?

¹¹Ungavimba nesimba rayo guru here? Ko, ungaisiyira basa rako rinorema here?

¹²Ungavimba nayo kuti ikutakurire zviyo zvako uye igozviunza paburiro rako here?

¹³“Mapapiro emhou anopapama nomufaro mukuru, asi haangaenzaniswi namapapiro uye neminhenga yedambiramurove.

¹⁴Zvirokwazvo inokandira mazai ayo muvhu igoarega achidziyirwa mujecha,

¹⁵isina hanya kuti rutsoka rungaapwanya, kana kuti mhuka dzesango dzingaatsika.

¹⁶Inobata vana vayo noukasha, kunge vasati vari vayo; haina hanya kuti yakatambudzika pasina,

¹⁷nokuti Mwari haana kuisa njere mairi kana kuipa mugove wepfungwa dzakanaka.

¹⁸Asi kana ikatambanudza mapapiro ayo kuti imhanye, inoseka bhiza nomutasvi waro.

¹⁹“Iwe unopa bhiza simba raro kana kushongedza mutsipa waro nezenze rinopepereka here?

²⁰Ndiwe unoita kuti rikwakuke semhashu, richivhundutsira nokupfeza, kwokuzvikudza kwaro here?

²¹Rinoteta risingatyi, richifarira simba raro, rigobuda richienda kundorwa.

²²Rinoseka kutya, harina charinotya; haritizi munondo.

²³Goba remiseve rinorira parutivi paro, pamwe chete nepfumo nebakatwa zvinovaima.

²⁴Neshungu rinodya ivhu; harigoni kumira rakadzikama kana richinzwa kurira kwehwamanda.

²⁵Pakurira kwehwamanda rinopfeza, roti, ‘Hekani!’ Rinofembedza hwema hwehondo ichiri kure, kudanidzira kwavakuru vehondo nemheremhere yehondo.

²⁶“Ko, rukodzi runobhururuka nouchenjeri hwako here parunotambanudza mapapiro arwo rwakananga zasi?

²⁷Ko, gondo rinobhururuka nokuda kwokurayira kwako here richindovaka dendere raro pakakwirira?

²⁸Rinogara pamawere uye rinovatapo usiku; shongwe yedombo ndiyo nhare yaro.

²⁹Riri ipapo rinotsvaka zvokudya zvaro; meso aro anozviona zvichiri kure.

³⁰Vana varo vanodya ropa, uye pane chakaurayiwa ndipo pariri.”