Read Bhaibheri Dzvene MuChiShona Chanhasi Jobho 4 Bible Online

Jobho 4 - Bhaibheri Dzvene MuChiShona Chanhasi bible

Jobho 4

¹Ipapo Erifazi muTemani akapindura achiti:

²“Kana mumwe munhu akava neshoko newe, iwe uchashayiwa mwoyo murefu here? Asi ndiani angarega kutaura?

³Funga kuti wakadzidzisa vazhinji sei, uye kuti wakasimbisa sei maoko asina simba.

⁴Mashoko ako akatsigira vaya vakagumburwa; wakasimbisa mabvi akaneta.

⁵Asi zvino nhamo yasvika kwauri, uye iwe waora mwoyo; inokurova, iwe ndokuvhunduka.

⁶Ko, kutya kwako Mwari hakuzi chivimbo chako, uye nzira dzako dzakarurama tariro yako here?

⁷“Rangarira iye zvino: Ndianiko, asina mhaka, akamboparadzwa? Ndokupiko kwakatongoparadzwa vakarurama?

⁸Sezvandakaona, vaya vanodyara zvakaipa navaya vanokusha nhamo ndizvo zvavanokohwa.

⁹Vanoparadzwa nokufema kwaMwari; vanoparara nokuputika kwehasha dzake.

¹⁰Shumba dzingaomba nokunguruma, nyamba meno eshumba huru akaguduka.

¹¹Shumba inoparara nokuda kwokushaya nyama, uye vana veshumbakadzi vanopararira.

¹²“Shoko rakauyiswa kwandiri muchivande, nzeve dzangu dzakanzwa zevezeve raro.

¹³Pakati pokurota hope dzinovhundutsa usiku, hope huru padzinenge dzabata vanhu,

¹⁴kutya nokudedera zvakandibata zvikaita kuti mapfupa angu ose abvunde.

¹⁵Mumwe mweya wakapfuura pamberi pechiso changu, uye bvudzi romusoro wangu rikamira.

¹⁶Wakamira, asi ndakatadza kuziva kuti chaiva chii. Chinhu chakamira pamberi pameso angu, uye ndakanzwa inzwi rakanyarara richiti:

¹⁷‘Ko, munhu anofa, angava akarurama kupfuura Mwari here? Ko, munhu angagona kuchena kukunda Muiti wake here?

¹⁸Kana Mwari akasavimba navaranda vake, kana akakanganisa kutonga vatumwa vake,

¹⁹zvikuru sei kuna avo vanogara mudzimba dzevhu, nheyo dzavo dziri muguruva, dzinopwanyiwa nyore kupfuura chipfukuto!

²⁰Dzinoputsanyiwa pakati pamambakwedza namadekwana; dzinoparara dzisingazoonekwi nokusingaperi.

²¹Ko, mabote etende ravo haana kubviswa here kuti vagofa vasina uchenjeri?’