Read Bhaibheri Dzvene MuChiShona Chanhasi Jobho 40 Bible Online

Jobho 40 - Bhaibheri Dzvene MuChiShona Chanhasi bible

Jobho 40

¹Jehovha akati kuna Jobho:

²“Ko, munhu anokakavadzana noWamasimba Ose angamurayira here? Anopomera Mwari mhosva ngaamupindure!”

³Ipapo Jobho akapindura Jehovha akati:

⁴“Ini handina maturo, ndingakupindurai seiko? Ndafumbira muromo wangu.

⁵Ndakataura kamwe chete, asi handina mhinduro, kaviri, asi handichapamhidzazve.”

⁶Ipapo Jehovha akataura naJobho ari mudutu akati:

⁷“Chizvisunga chiuno somurume; ini ndichakubvunza, uye iwe uchandipindura.

⁸“Ko, iwe unoda kukanganisa kururamisira kwangu here? Ko, unondipomera kuti uzviruramise here?

⁹Uno ruoko rwakaita sorwaMwari here, uye inzwi rako ringatinhira serake here?

¹⁰Chizvishongedza zvino nokukudzwa uye nokubwinya, uye zvishongedze nokuremekedzwa uye noumambo.

¹¹Regedzera ukasha hwehasha dzako, utarire munhu mumwe nomumwe anozvikudza ugomuderedza,

¹²tarira murume mumwe nomumwe anozvikudza ugomuninipisa, pwanya vakaipa ipapo pavamire.

¹³Uvavige vose pamwe chete muguruva; ufukidze zviso zvavo muguva.

¹⁴Ipapo ini pachangu ndichabvuma kwauri kuti ruoko rwako rworudyi rungakuponesa.

¹⁵“Tarisa kumvuu, yandakaita pamwe chete newe uye inofura uswa senzombe.

¹⁶Simba rainaro muchiuno chayo, kusimba kwayo kuri mumakakava edumbu rayo.

¹⁷Muswe wayo unotsvikidza somusidhari; marunda ezvidya zvayo akasonanidzwa.

¹⁸Mapfupa ayo ipombi dzendarira, miromo yayo yakaita setsvimbo dzesimbi.

¹⁹Iyo iri pachinzvimbo chokutanga pakati pamabasa aMwari, asi Muiti wayo anogona kusvika pairi nomunondo wake.

²⁰Zvikomo zvinoivigira zvibereko zvayo, uye zvikara zvose zvesango zvinotambira pedyo nayo.

²¹Inovata pasi pemiti yemirotasi yakavanda pakati petsanga munhope.

²²Mirotasi inoivanza pamimvuri yayo; mikonachando iri mujinga morukova inoipoteredza.

²³Panozara rwizi, iyo haivhunduki; inodekara zvayo, kunyange Jorodhani rukapfachukira kumuromo wayo.

²⁴Pano munhu angagona kuibata neziso, kana kuiteya uye nokuibaya pamhino yayo here?