Read Bhaibheri Dzvene MuChiShona Chanhasi Jobho 41 Bible Online

Jobho 41 - Bhaibheri Dzvene MuChiShona Chanhasi bible

Jobho 41

¹“Ungagona kukweva ngwena nechiredzo, kana kusunga rurimi rwayo netambo here?

²Ungagona kupinza mukaro mumhino dzayo, kana kuboora rushaya rwayo nechiredzo here?

³Ko, ingaramba ichikumbira kunzwirwa ngoni newe here? Ko, ingataura kwauri mashoko manyoro here?

⁴Ko, ingaita chitenderano newe here kuti iwe uitore senhapwa kwoupenyu hwayo hwose?

⁵Ungagona kuipfuwa seshiri here kana kuisunga kuti vanasikana vako vatambe nayo?

⁶Ko, vatengesi vangaitsinhanisa here? Ko, vangaigoverana pakati pavashambadziri here?

⁷Ungagona kuzadza dehwe rayo nemiseve ine nzeve here, kana kuzadza musoro wayo namapfumo okuredzesa hove?

⁸Kana ukaisa ruoko rwako pairi uchazorangarira kurwisana kwako nayo uye haungazozvipamhizve!

⁹Tariro ipi zvayo yokuitonga ndeyenhema; kungoiona bedzi kunopedza simba.

¹⁰Hakuna munhu anotyisa zvokuti angaidenha. Ndianiko zvino anogona kumisidzana neni?

¹¹Ndianiko wandakatorera chinhu wandinofanira kuripira? Zvinhu zvose zviri pasi pedenga ndezvangu.

¹²“Handingakonewi kutaura zvemitezo yayo, simba rayo uye chimiro chayo chakanaka.

¹³Ndianiko angabvisa dehwe rayo? Ndianiko angasvika kwairi namatomu?

¹⁴Ndianiko anotsunga kuzarura mikova yomuromo wayo, iwo wakakomberedzwa nameno ayo anotyisa?

¹⁵Musana wayo une mitsara yamakwande yakanyatsonamirwa pamwe chete;

¹⁶rimwe nerimwe riri pedyo pedyo nerimwe, zvokuti hakuna mhepo inopinda napakati.

¹⁷Akanyatsobatanidzwa pane rimwe nerimwe; akanamatirana pamwe chete uye haagoni kuparadzaniswa.

¹⁸Kuhotsira kwayo kunoita mamvari omoto; meso ayo akaita sehwerazuva hwamambakwedza.

¹⁹Mazhenje omoto anoyerera achibva mumuromo mayo; zvimvari zvomoto zvinobarikira kunze.

²⁰Utsi hunobuda mumhino dzayo sepahari inovira pamusoro pomoto wetsanga.

²¹Kufema kwayo kunopfutidza mazimbe omoto, uye murazvo unobuda mumuromo mayo.

²²Simba rinogara pamutsipa wayo; kuvhundutsa kuri pamberi payo.

²³Nhindi dzenyama yayo dzakabatanidzwa zvakasimba; dzakasimba uye hadzizungunuswi.

²⁴Chipfuva chayo chakaoma sebwe, chakaoma sapasi peguyo.

²⁵Painosimuka, vane simba vanovhundutswa, vanodududzira shure isati yarova mvura.

²⁶Munondo unosvika kwairi hauna simba, uye pfumo kana museve kana pfumo guru hazvina simba.

²⁷Simbi inoita seshanga kwairi, uye ndarira sedanda rakaora.

²⁸Miseve haingaiti kuti itize; zvimviriri zvakaita sehundi kwairi.

²⁹Tsvimbo inoita kunge chidimbu cheshanga kwairi; inoseka panorira bakatwa.

³⁰Pasi payo pakaita sezvaenga zvehari, inosiya muhwezva mumatope sechirei chinokwevewa.

³¹Inoita kuti mvura yakadzika ivire segate rinovhaira, uye inokurunga gungwa sehari yamafuta.

³²Shure kwayo inosiya muhwezva unopenya; mumwe munhu angafunga kuti mvura yakadzika yava nevhudzijena.

³³Hapana chakaenzana nayo munyika, chisikwa chisingatyi.

³⁴Inotarisira pasi zvose zvinozvikudza; ndiyo mambo pamusoro pezvose zvinozvikudza.”