Read Bhaibheri Dzvene MuChiShona Chanhasi Jobho 5 Bible Online

Jobho 5 - Bhaibheri Dzvene MuChiShona Chanhasi bible

Jobho 5

¹“Chidana zvino kana uchida, asi ndianiko achadavira? Uchadzokera kuno upiko wavatsvene?

²Kutsamwa kunouraya benzi, uye godo rinouraya asina mano.

³Ini pachangu ndakaona benzi richidzika midzi, asi pakarepo imba yake yakatukwa.

⁴Vana vake havana kuchengetedzeka, vanopwanyiwa padare vasina anovarwira.

⁵Vane nzara vanodya zvaakacheka, vachizvitora kunyange pakati peminzwa, uye vane nyota vanodokwairira pfuma yake.

⁶Nokuti kutambudzika hakubudi muvhu, uye nhamo haimeri muvhu.

⁷Asi munhu anoberekerwa nhamo, zvirokwazvo sokubarika kwomoto kunokwira kumusoro.

⁸“Asi dai ndakanga ndirini, ndaiturira mhosva yangu kuna Mwari; ndaiisa mhaka yangu pamberi pake.

⁹Anoita minana isingagoni kuyerwa, zvishamiso zvisingagoni kuverengwa.

¹⁰Anopa mvura panyika; anotuma mvura pamusoro penyika.

¹¹Vanozvininipisa anovaisa pakakwirira, uye vaya vanochema vanosimudzirwa kuchinzvimbo chokuchengetedzwa.

¹²Anokonesa zvirongwa zvavanyengeri, kuitira kuti maoko avo abate pasina.

¹³Anobata vakachenjera muunyengeri hwavo, uye zvirongwa zvenhubu zvinokukurwa.

¹⁴Rima rinosvika pamusoro pavo masikati; vanotsvanzvadzira masikati makuru sapausiku.

¹⁵Anoponesa vanoshayiwa kubva pamunondo uri pamiromo yavo; anovaponesa pakudzvinya kwavane simba.

¹⁶Saka varombo vane tariro, uye kusaruramisira kunopfumbira muromo wako.

¹⁷“Akaropafadzwa munhu anogadziridzwa zvaari naMwari; saka usazvidza kuranga kwoWamasimba Ose.

¹⁸Nokuti anopa vanga, asi achisungazve; anokuvadza, asi maoko ake anorapazve.

¹⁹Achakurwira kubva panjodzi nhanhatu; kunyange panomwe hakuna kukuvadzwa kuchakuwira.

²⁰Munzara achakudzikinura kubva parufu, uye muhondo kubva pakubaya kwomunondo.

²¹Uchadzivirirwa kubva pakurova kworurimi, uye haungatyi panosvika kuparadza.

²²Uchaseka kuparadza nenzara, uye haufaniri kutya zvikara zvenyika.

²³Nokuti uchaita sungano namabwe esango, uye zvikara zvesango zvichava norugare newe.

²⁴Uchaziva kuti tende rako rakasimba, uchaverenga zvinhu zvako ugowana zvakakwana.

²⁵Uchaziva kuti vana vako vachava vazhinji, uye zvizvarwa zvako zvichaita souswa hwenyika.

²⁶Uchasvika paguva une simba guru, sezvisote zvakaunganidzwa panguva yazvo.

²⁷“Takazviedza izvi, uye ndezvechokwadi. Saka chizvinzwa ugozviita iwe pachako.”