Read Bhaibheri Dzvene MuChiShona Chanhasi Jobho 6 Bible Online

Jobho 6 - Bhaibheri Dzvene MuChiShona Chanhasi bible

Jobho 6

¹Ipapo Jobho akapindura akati:

²“Dai chete kurwadziwa kwangu kwaigona kuyerwa uye kusuwa kwangu kwaiiswa pachiyero!

³Zvirokwazvo zvairema kupfuura jecha ramakungwa, hazvishamisi kana mashoko angu aiva okuvhurumuka.

⁴Miseve yoWamasimba Ose iri mandiri, mweya wangu unonwa muchetura wayo; kutyisa kwaMwari kwagadzirira kurwa neni.

⁵Ko, mbizi ingachema kana ine bundo here? Ko, nzombe inokuma kana ine zvokudya here?

⁶Ko, chokudya chisinganaki chingadyiwa chisina munyu here? Ko, chichena chezai chinonaka here?

⁷Ndinoramba kuzvibata; zvokudya zvakadai zvinondirwarisa.

⁸“Haiwa, dai ndapiwa hangu zvandinokumbira kuti Mwari andipe zvandinotarisira,

⁹kuti dai Mwari aida hake kundipwanya, kuti aregere ruoko rwake rundiuraye!

¹⁰Ipapo ndaizova hangu nokunyaradzwa uku, mufaro wangu mukurwadziwa kusingagumi, kuti handina kunge ndamboramba mashoko aiye Mutsvene.

¹¹“Ndinaro here simba, rokuti ndirambe ndine tariro? Tariro yacho ndeyeiko kuti nditsungirire?

¹²Ko, ndine simba rebwe here? Ko, nyama yangu indarira here?

¹³Ko, ndine simba here rokuti ndione kuti ndabatsirika, sezvo zvino kubudirira kwakabviswa kwandiri?

¹⁴“Munhu asina tariro anofanira kuwana rudo rweshamwari dzake, kunyange iye arega kutya Wamasimba Ose.

¹⁵Asi hama dzangu hadzivimbike sezvinongoita hova dzava kudira. Sezvinongoita hova dzopfachukira,

¹⁶dzinosviba pakunyungudika kwamagwada echando, uye dzinozadzwa nokunyungudika kwamagwada echando,

¹⁷asi dzinoguma kuyerera mumwaka wokupisa, uye mihoronga yadzo inopwa mukupisa.

¹⁸Mihoronga inotsauka kubva munzira dzayo; inoenda kumakura ndokuparara.

¹⁹Vafambi veTema vanotsvaka mvura, vashambadziri veShebha vanomirira netariro.

²⁰Vachaora mwoyo, nokuti vaivimba nesimba ravo; vasvikapo, vachashaya zvokuita.

²¹Zvino nemiwo maratidza kusabatsira; munoti mukaona chinhu chinotyisa mobva matya.

²²Ko, ndakamboti, ‘Ndipeiwo chipo, ndipei fufuro rinobva papfuma yenyu,

²³ndirwirei muruoko rwomuvengi, ndidzikinurei mumaoko avanhu vano utsinye’ here?

²⁴“Ndidzidzisei, uye ndichanyarara hangu; ndiratidzei pandakakanganisa.

²⁵Mashoko echokwadi anorwadza sei! Asi gakava renyu rinoratidzeiko?

²⁶Munoda kutsiura zvandareva, nokutora mashoko omunhu arasa tariro semhepo here?

²⁷Muchada kana kukanda mijenya pamusoro penherera uye nokutengesa shamwari yenyu.

²⁸“Asi zvino chinditarirai netsitsi. Ko, ndingareva nhema pamberi penyu here?

²⁹Musadaro, musava vasakarurama; fungai zvakare, nokuti kururama kwangu kuchiripo.

³⁰Ko, pamiromo yangu pane zvakaipa here? Ko, muromo wangu haugoni kunzvera zvakaipa here?