Read Bhaibheri Dzvene MuChiShona Chanhasi Jobho 8 Bible Online

Jobho 8 - Bhaibheri Dzvene MuChiShona Chanhasi bible

Jobho 8

¹Ipapo Bhiridhadhi muShuhi akapindura akati:

²“Uchasvika riini uchitaura zvinhu zvakadai? Mashoko ako imhepo inovhuvhuta.

³Ko, Mwari angaminamisa zvakarurama here? Ko, iye Wamasimba Ose angaminamisa kururama here?

⁴Vana vako pavakamutadzira, akaita kuti varangirwe chivi chavo.

⁵Asi kana ukatarisa kuna Mwari uye ukademba kuna Wamasimba Ose,

⁶kana uri wakachena uye wakarurama, kunyange izvozvi achasimuka kuti akurwire, agokudzoserazve panzvimbo yako chaiyo.

⁷Kunyange mavambo ako akanga ari epasi pasi, ramangwana rako richava rokubudirira.

⁸“Bvunza marudzi akare ugocherechedza zvakadzidzwa namadzibaba avo,

⁹nokuti isu takaberekwa zuro uye hatina chatinoziva, uye mazuva edu panyika akangoita somumvuri.

¹⁰Ko, havangakudzidzisi uye vagokuudza here? Ko, havangakuvigiri mashoko anobva pakunzwisisa kwavo here?

¹¹Ko, nhokwe dzingamera pasina nhope here? Ko, tsanga dzingararama pasina mvura here?

¹²Dzichiri kumera uye dzisati dzatemwa, dzinokurumidza kuoma kupinda uswa.

¹³Ndizvo zvakaita magumo avose vanokanganwa Mwari; saizvozvo tariro yavasina Mwari inoparara.

¹⁴Zvaanovimba nazvo hazvina kusimba, zvaanovimba nazvo mambure edandemutande.

¹⁵Anosendamira padandemutande rake, asi rinobvaruka; anobatirira pariri, asi harimiri.

¹⁶Akafanana nomuti wakanyatsodiridzwa pamushana, unotandavadza mabukira awo pamusoro pebindu;

¹⁷unomonera midzi yawo pamurwi wamatombo, uye unotsvaka nzvimbo pakati pamatombo.

¹⁸Asi kana ukatsemuka ukadzurwa kubva panzvimbo yawo, nzvimbo iyo ichauramba igoti, ‘Handina kumbokuona.’

¹⁹Zvirokwazvo upenyu hwawo, hunooma, uye mimwe miti inomera ichibuda muvhu.

²⁰“Zvirokwazvo Mwari haarambi munhu asina mhaka uye haasimbisi maoko avaiti vezvakaipa.

²¹Achazadza muromo wako nokuseka uye miromo yako nokupururudza.

²²Vavengi vako vachashongedzwa kunyadziswa, uye matende avakaipa haachazovapozve.”