Read Bhaibheri Dzvene MuChiShona Chanhasi Jobho 9 Bible Online

Jobho 9 - Bhaibheri Dzvene MuChiShona Chanhasi bible

Jobho 9

¹Ipapo Jobho akapindura akati:

²“Zvirokwazvo ndinoziva kuti ichokwadi. Asi munhu anofa angava akarurama pamberi paMwari seiko?

³Kunyange dai mumwe aida kuita nharo naye, haaizogona kumupindura kamwe chete pamibvunzo chiuru.

⁴Uchenjeri hwake hwakadzika, simba rake iguru kwazvo. Ndianiko akamudzivisa akabuda asina vanga?

⁵Anofambisa makomo iwo asingazivi agoapidigura mukutsamwa kwake kukuru.

⁶Anozungunusa nyika ikabva panzvimbo yayo uye anoita kuti mbiru dzayo dzidengenyeke.

⁷Anotaura kuzuva iro ndokurega kuvhenekera; anodzivira chiedza chenyeredzi.

⁸Iye oga anotambanudza matenga uye anofamba pamusoro pamafungu egungwa.

⁹Ndiye Muiti weNyeredzi dzeAkutiro neOrioni, dzeChimunomwe namapoka enyeredzi dzenyasi.

¹⁰Anoita minana isingagoni kunzwisisiswa, nezvishamiso zvisingagoni kuverengwa.

¹¹Paanondipfuura, handigoni kumuona; paanoenda napo handingamuoni.

¹²Kana achibvuta, ndiani angamudzivisa? Ndiani angati kwaari, ‘Unoiteiko?’

¹³Mwari haadzori kutsamwa kwake; kunyange boka ravarwi raRahabhi rakawira patsoka dzake nokutya.

¹⁴“Zvino ndingakakavadzana naye seiko? Ndingawana seiko mashoko okuita nharo naye?

¹⁵Kunyange ndakanga ndisina mhaka, handaigona kumupindura; ndaingokumbira hangu nyasha kuMutongi wangu.

¹⁶Kunyange dai ndaimudana hangu uye akandipindura, handitendi kuti aizowana nguva yokundinzwa.

¹⁷Aizondiparadza nedutu uye achizowedzera maronda angu pasina mhosva.

¹⁸Haaizonditenderazve kuti nditure mafemo, asi aizondizadza namatambudziko.

¹⁹Kana zviri zvesimba, iye ane simba guru! Uye kana zviri zvokururamisira, ndianiko angamudana kuti amutonge?

²⁰Kunyange dai ndisina mhosva, muromo wangu waizongondipa mhaka; dai zvangu ndakarurama, iwo waizongondipa mhaka.

²¹“Kunyange ndisina mhosva, handina hangu hanya nazvo; ndinozvidza upenyu hwangu pachangu.

²²Zvakangofanana; ndokusaka ndichiti, ‘Iye anoparadza vasina mhosva nevakaipa.’

²³Kana dambudziko rikauyisa rufu nokukurumidza, achaseka kushaya tariro kwavasina mhosva.

²⁴Panowira nyika mumaoko avakaipa, vatongi vayo anovapofumadza. Kana asiri iye, zvino ndianiko?

²⁵“Mazuva angu anokurumidza kupfuura mumhanyi; anobhururuka oenda asina kumboona mufaro.

²⁶Anopfuura sezvikepe zvenhokwe, kufanana namakondo anomhanyira nyama yawo.

²⁷Kana ndikati, ‘Ndichakanganwa kunyunyuta kwangu, ndichashandura chiso changu, ndigonyemwerera,’

²⁸ndinongotya kutambura kwangu, nokuti ndinoziva kuti imi hamuregi kundipa mhosva.

²⁹Sezvo ndatopiwa hangu mhosva, ko, ndichagotamburirei pasina?

³⁰Kunyange dai ndikazvishambidza nesipo uye ndikashamba maoko angu nesoda,

³¹imi muchandinyudza mugomba rematope zvokuti kunyange nenguo dzangu dzichandisema.

³²“Iye haasi munhu akafanana neni kuti ndimupindure, kuti zvimwe iye neni tisangane mudare redzimhosva.

³³Dai chete paingova nomumwe angamira pakati pedu, kuti aise ruoko rwake patiri tose,

³⁴mumwe zvake angabvise shamhu yaMwari kwandiri, kuti kutyisa kwake kurege kundivhundutsazve.

³⁵Ipapo ndichataura ndisingamutyi, asi sezvazvakaita kwandiri iye zvino, handingakwanisi.