Read Bhaibheri Dzvene MuChiShona Chanhasi Mapisarema 102 Bible Online

Mapisarema 102 - Bhaibheri Dzvene MuChiShona Chanhasi bible

Mapisarema 102

¹Munyengetero womunhu anotambudzika. Paanenge aziya uye odurura kuchema kwake pamberi paJehovha. Inzwai munyengetero wangu, imi Jehovha; kuchemera kwangu rubatsiro ngakusvike kwamuri.

²Regai kundivanzira chiso chenyu pandinenge ndichitambudzika. Rerekerai nzeve yenyu kwandiri; pandinokudanai, ndipindurei nokukurumidza.

³Nokuti mazuva angu anopera soutsi; mapfupa angu anopisa samazimbe anopfuta.

⁴Mwoyo wangu warohwa uye waoma souswa; ndinokanganwa kudya zvokudya zvangu.

⁵Nokuda kwokugomera kwangu kukuru ndaonda zvokuti ganda rangu ranamatira pamapfupa.

⁶Ndafanana nezizi romugwenga, sezizi riri pakati pamatongo.

⁷Ndinovata ndakasvinura, ndava seshiri iri yoga pamusoro pedenga remba.

⁸Zuva rose vavengi vangu vanondishungurudza; avo vanondipengera vanoshandisa zita rangu sechituko.

⁹Nokuti ndinodya madota sechokudya changu, uye ndinovhenganisa zvokunwa zvangu nemisodzi,

¹⁰nokuda kwehasha dzenyu huru, nokuti makandisimudza mukandikanda parutivi.

¹¹Mazuva angu akaita somumvuri wamadekwana; ndinosvava souswa.

¹²Asi imi, iyemi Jehovha, munogara pachigaro choushe nokusingaperi; mukurumbira wenyu uripo kusvikira kuzvizvarwa zvose.

¹³Imi muchasimuka mugonzwira Zioni tsitsi, nokuti ndiyo nguva yokurinzwira nyasha; nguva yakatarwa yasvika.

¹⁴Nokuti matombo aro anokosha kuvaranda venyu; guruva raro chairo rinovaendesa kugomba.

¹⁵Ndudzi dzichatya zita raJehovha, madzimambo ose enyika achatya kubwinya kwenyu.

¹⁶Nokuti Jehovha achavakazve Zioni, agozviratidza pakubwinya kwake.

¹⁷Achadavira minyengetero yavanotambura; haangazvidzi chikumbiro chavo.

¹⁸Izvi ngazvinyorerwe zvizvarwa zvamangwana, kuti vanhu vasati vasikwa vagorumbidza Jehovha vachiti,

¹⁹“Jehovha akatarira pasi ari panzvimbo yake tsvene yakakwirira, ari kudenga akacherechedza pasi,

²⁰kuti anzwe kugomera kwavasungwa agosunungura avo vakatongerwa rufu.”

²¹Saka zita raJehovha richaparidzwa muZioni, nokurumbidzwa kwake muJerusarema,

²²panoungana marudzi noushe kuti vanamate Jehovha.

²³Panguva youpenyu hwangu akatapudza simba rangu; akaita kuti mazuva angu ave mashoma.

²⁴Saka ndakati, “Regai kundibvisa, imi Mwari wangu, pakati pamazuva angu; makore enyu anoramba aripo kusvikira kuzvizvarwa zvose.

²⁵Pamavambo makateya nheyo dzenyika, uye matenga ibasa basa ramaoko enyu.

²⁶Izvo zvichaparara, asi imi munogara muripo; zvose zvichasakara senguo. Senguo muchavabvisa uye vacharaswa.

²⁷Asi imi mucharamba makadaro, uye makore enyu haatongogumi.

²⁸Vana vavaranda venyu vachagara pamberi penyu; zvizvarwa zvavo zvichasimbiswa pamberi penyu.”