Read Bhaibheri Dzvene MuChiShona Chanhasi Mapisarema 103 Bible Online

Mapisarema 103 - Bhaibheri Dzvene MuChiShona Chanhasi bible

Mapisarema 103

¹Pisarema raDhavhidhi. Rumbidza Jehovha, iwe mweya wangu; zvose zviri mukati mangu, ngazvirumbidze zita rake dzvene.

²Rumbidza Jehovha, iwe mweya wangu, uye urege kukanganwa mikomborero yake yose,

³iye anokanganwira zvivi zvako zvose, uye anoporesa kurwara kwako kwose,

⁴anodzikinura upenyu hwako kubva pagomba, uye anokushongedza korona yorudo netsitsi,

⁵anogutsa zvido zvako nezvinhu zvakanaka, kuti uduku hwako huvandudzwe sohwegondo.

⁶Jehovha anoita zvakarurama, uye anoruramisira vose vakadzvinyirirwa.

⁷Akazivisa nzira dzake kuna Mozisi, namabasa ake kuvanhu veIsraeri:

⁸Jehovha ane tsitsi nenyasha, anononoka kutsamwa, azere norudo.

⁹Haangarambi achipomera mhosva, uye haangarambi akatsamwa nokusingaperi;

¹⁰haatiitiri sezvakafanira zvivi zvedu, kana kutipa mubayiro sezvakafanira zvakaipa zvedu.

¹¹Nokuti sokukwirira kwaakaita kudenga kumusoro kwenyika, ndizvo zvakaita kukura kworudo rwake kuna vanomutya;

¹²sokuva kure kwamabvazuva namavirira, saizvozvo akabvisa kudarika kwedu kwatiri.

¹³Sokunzwira tsitsi kunoita baba vana vavo, saizvozvo Jehovha ane tsitsi pamusoro pavanomutya;

¹⁴nokuti anoziva kuti takaumbwa sei, anorangarira kuti tiri guruva.

¹⁵Kana ari munhu zvake, mazuva ake akaita souswa, anokura seruva resango;

¹⁶mhepo inorova napamusoro paro onei raenda, uye nzvimbo yaranga riri haicharirangaririzve.

¹⁷Asi kubva pakusingaperi kusvikira pakusingaperi, rudo rwaJehovha rwuri pane avo vanomutya, nokururama kwake kuvana vavana vavo,

¹⁸naavo vanochengeta sungano yake uye vanorangarira kuita zvaakatema.

¹⁹Jehovha akasimbisa chigaro chake choushe kudenga, uye ushe hwake hunotonga zvinhu zvose.

²⁰Rumbidzai Jehovha, imi vatumwa vake, nemi vane simba vanoita zvaakarayira, vanoteerera shoko rake.

²¹Rumbidzai Jehovha, imi hondo dzose dzokudenga, imi varanda vake vanoita kuda kwake.

²²Rumbidzai Jehovha, imi mabasa ake ose kwose kwose kuno umambo hwake. Rumbidza Jehovha, mweya wangu.