Read Bhaibheri Dzvene MuChiShona Chanhasi Mapisarema 104 Bible Online

Mapisarema 104 - Bhaibheri Dzvene MuChiShona Chanhasi bible

Mapisarema 104

¹Rumbidza Jehovha, mweya wangu. Haiwa Jehovha Mwari wangu, muri mukuru kwazvo; makashongedzwa nokubwinya noumambo.

²Iye anozviputira muchiedza seanozviputira nenguo; anotatamura matenga kunge tende

³uye anogadzika matanda edzimba dzake dzapamusoro pamusoro pemvura yadzo zhinji. Anoita makore ngoro dzake, uye anokwira pamapapiro emhepo.

⁴Anoita mhepo nhume dzake, namazhenje omoto varanda vake.

⁵Akamisa nyika pamusoro penheyo dzayo; haingatongozungunuswi.

⁶Makaifukidza nokwakadzika somunofukidza nenguo; mvura zhinji yakamira pamusoro pamakomo.

⁷Asi pakutsiura kwenyu mvura zhinji yakatiza, pakunzwa kutinhira wenyu yakatiza;

⁸yakayerera napamusoro pamakomo, ikadzika nomumipata, ichienda kunzvimbo yamakairayira.

⁹Makatara muganhu waisingadariki; haichazombofukidzizve nyika.

¹⁰Anoita kuti matsime adire mvura mumipata; inoyerera napakati pamakomo.

¹¹Anonwisa mhuka dzose dzesango mvura; mbizi dzinopedza nyota yadzo.

¹²Shiri dzedenga dzinovaka matendere adzo pedyo nemvura; dzinorira dziri pakati pamatavi.

¹³Anodiridza makomo ari padzimba dzake dzapamusoro; nyika inogutswa nezvibereko zvebasa rake.

¹⁴Anomeresa uswa hwemombe, nembeu kuti vanhu vasakure, achibudisa zvokudya kubva pasi:

¹⁵iyo waini inofadza mwoyo womunhu, namafuta anopenyesa chiso chake, nechingwa chinosimbisa mwoyo wake.

¹⁶Miti yaJehovha inodiridzwa zvakanaka, iyo misidhari yeRebhanoni yaakasima.

¹⁷Shiri dzinoruka matendere adzo ipapo; dambiramurove rakaita imba yaro mumiti yomupaini.

¹⁸Makomo marefu ndeengururu; mapako ndiwo utiziro hwembira.

¹⁹Mwedzi unotara nguva, uye zuva rinoziva nguva yokuvira kwaro.

²⁰Munouyisa rima, usiku hugovapo, uye zvikara zvose zvesango zvinobuda kundovhima.

²¹Shumba dzinoomba dzichitsvaka nyama, uye dzinotsvaka zvokudya zvadzo kubva kuna Mwari.

²²Kana zuva robuda, idzo dzinoenda kure; dzinodzokera dzondovata mumapako adzo.

²³Ipapo munhu anobuda oenda kubasa rake, kumushando wake kusvikira madekwana.

²⁴Haiwa Jehovha, mabasa enyu manganiko! Makaaita ose nenjere; nyika izere nezvisikwa zvenyu.

²⁵Hero gungwa, rakakura uye rakapamhama, rine zvisikwa zvisingagoni kuverengwa, zvipenyu zvikuru nezviduku.

²⁶Hezvo zvikepe zvinofamba-famba, nengwena, yamakaumba kuti itambemo.

²⁷Zvose izvi zvinotarira kwamuri kuti muzvipe zvokudya zvazvo nenguva yakafanira.

²⁸Pamunozvipa, zvinozviunganidza; pamunozarura ruoko rwenyu, izvo zvinogutswa nezvinhu zvakanaka.

²⁹Pamunovanza chiso chenyu, izvo zvinovhundutswa; pamunozvitorera mweya, izvo zvinofa uye zvinodzokera kuguruva.

³⁰Pamunotuma Mweya wenyu, izvo zvinosikwa, uye munovandudza chiso chenyika.

³¹Kubwinya kwaJehovha ngakugare nokusingaperi; Jehovha ngaafare nebasa rake,

³²iye anotarira nyika, yobva yabvunda, iye anobata makomo obva apwititika utsi.

³³Ndichaimbira Jehovha upenyu hwangu hwose; ndichaimbira Mwari wangu nziyo dzokurumbidza ndichiri mupenyu.

³⁴Kurangarira kwangu ngakumufadze, pandinofara muna Jehovha.

³⁵Asi vatadzi ngavaparadzwe panyika, uye vakaipa ngavarege kuzovapozve. Rumbidza Jehovha, mweya wangu. Rumbidzai Jehovha.