Read Bhaibheri Dzvene MuChiShona Chanhasi Mapisarema 105 Bible Online

Mapisarema 105 - Bhaibheri Dzvene MuChiShona Chanhasi bible

Mapisarema 105

¹Vongai Jehovha, danai kuzita rake; zivisai zvaakaita pakati pendudzi.

²Muimbirei, muimbirei nziyo dzokurumbidza; rondedzerai mabasa ake ose anoshamisa.

³Ngarikudzwe zita rake dzvene; mwoyo yavanotsvaka Jehovha ngaifare.

⁴Tarirai kuna Jehovha nokusimba rake; tsvakai chiso chake nguva dzose.

⁵Rangarirai zvishamiso zvaakaita, mabasa ake, nezvaakatonga zvaakareva,

⁶imi vana vaAbhurahama muranda wake, haiwa vanakomana vaJakobho, vasanangurwa vake.

⁷Ndiye Jehovha Mwari wedu; kutonga kwake kuri munyika yose.

⁸Anorangarira sungano yake nokusingaperi, iro shoko raakarayira, kuchiuru chezvizvarwa,

⁹sungano yaakaita naAbhurahama, mhiko yaakapika kuna Isaka.

¹⁰Akaisimbisa kuna Jakobho somutemo, nokuna Israeri sesungano isingaperi achiti,

¹¹“Ndichapa nyika yeKenani kwauri somugove wenhaka yako.”

¹²Pavaiva vashoma pakuwanda, zvirokwazvo vari vashoma, uye vari vaeni mairi,

¹³vakadzungaira vachibva kuno rumwe rudzi kusvikira kuno rumwe rudzi. Kubva kuno humwe ushe vachienda kuno humwe.

¹⁴Haana kutendera munhu kuvadzvinyirira; akatuka madzimambo nokuda kwavo achiti,

¹⁵“Musabata vazodziwa vangu; musaitira vaprofita vangu zvakaipa.”

¹⁶Akadana nzara panyika ikaparadza zvose zvaiuyisa zvokudya;

¹⁷uye akatuma munhu pamberi pavo, iye Josefa, akatengeswa senhapwa.

¹⁸Vakakuvadza tsoka dzake nezvisungo mutsipa wake ukaiswa mumatare esimbi,

¹⁹kusvikira zvaakareva zvazadziswa, kusvikira shoko raJehovha raratidza kutendeka kwake.

²⁰Mambo akatuma shoko kuti asunungurwe, vatongi vavanhu vakamuregedza.

²¹Akamuita tenzi weimba yake, nomutongi wepfuma yake yose,

²²kuti arayire machinda ake sezvaaida uye adzidzise vakuru vake njere.

²³Ipapo Israeri akapinda muIjipiti; Jakobho akagara somweni munyika yaHamu.

²⁴Jehovha akawanza vanhu vake chose; akavaita vazhinji kwazvo kupinda vavengi vavo,

²⁵avo vaakashandura mwoyo yavo kuti ivenge vanhu vake, kuti varangane pamusoro pavaranda vake.

²⁶Akatuma Mozisi muranda wake, naAroni, waakanga asarudza.

²⁷Vakaita zviratidzo zvinoshamisa pakati pavo, izvo zvishamiso zvake munyika yaHamu.

²⁸Akatumira rima akaita kuti nyika ive murima, nokuti havana kumukira shoko rake here?

²⁹Akashandura mvura yavo zhinji ikava ropa, zvikaita kuti hove dzavo dzife.

³⁰Nyika yavo yakazara namatatya, akapinda mudzimba dzamadzimambo avo.

³¹Akataura mapupira enhunzi akauya, nenda munyika yavo yose.

³²Akashandura mvura yavo ikava chimvuramabwe, nemheni munyika yavo yose;

³³akarova mizambiringa yavo nemionde yavo, akaparadza miti yomunyika yavo.

³⁴Akataura, mhashu dzikauya, namagutaguta asingaverengeki;

³⁵zvakadya miriwo minyoro yose munyika yavo, zvikadya zvibereko zvevhu ravo.

³⁶Ipapo akarova matangwe munyika yavo, zvibereko zvokutanga zvesimba roujaya hwavo.

³⁷Akabudisa Israeri akaremerwa nesirivha negoridhe, kwakanga kusina akagumburwa pakati pamarudzi avo.

³⁸Ijipiti yakafara pavakabva, nokuti kutya vaIsraeri kwakanga kwavabata.

³⁹Akatatamura gore rikava chifukidzo, uye moto kuti uvhenekere usiku.

⁴⁰Vakakumbira, iye akavauyisira zvihuta, uye akavagutsa nechingwa chakabva kudenga.

⁴¹Akazarura dombo, mvura ikatubuka; ikayerera mugwenga sorwizi.

⁴²Nokuti akarangarira mhiko yake tsvene yaakapa Abhurahama muranda wake.

⁴³Akabudisa vanhu vake nomufaro, vasanangurwa vake nokupembera kwomufaro;

⁴⁴akavapa nyika dzendudzi, vakagara nhaka yakanga yatamburirwa navamwe,

⁴⁵kuti vachengete zvaakatema uye vacherechedze mirayiro yake. Rumbidzai Jehovha.