Read Bhaibheri Dzvene MuChiShona Chanhasi Mapisarema 106 Bible Online

Mapisarema 106 - Bhaibheri Dzvene MuChiShona Chanhasi bible

Mapisarema 106

¹Rumbidzai Jehovha. Vongai Jehovha, nokuti akanaka; nokuti rudo rwake runogara nokusingaperi.

²Ndianiko angaparidza mabasa aJehovha esimba, kana kureva kurumbidzwa kwake kwose?

³Vakaropafadzwa vanochengeta kururamisira, vanogara vachiita zvakarurama.

⁴Ndirangarirei, imi Jehovha, pamunoratidza nyasha kuvanhu venyu, pamunovaponesa, mundibatsirewo,

⁵kuti ndifadzwe nokubudirira kwavasanangurwa venyu, kuti ndigovane pamufaro wavanhu venyu, uye ndibatane nenhaka yenyu pakurumbidza.

⁶Takatadza, sezvakaita madzibaba edu; takaita zvakaipa uye takaita mabasa akaipa.

⁷Madzibaba edu paakanga ari muIjipiti, havana kumbofunga nezvezvishamiso zvenyu; havana kurangarira tsitsi dzenyu zhinji, asi vakakumukirai pagungwa, iro Gungwa Dzvuku.

⁸Kunyange zvakadaro akavaponesa nokuda kwezita rake, kuti simba rake guru rizivikanwe.

⁹Akarayira Gungwa Dzvuku iro rikapwa; uye akavafambisa napakadzika sevanopfuura nomugwenga.

¹⁰Akavaponesa kubva muruoko rwomuvengi; akavadzikinura kubva muruoko rwomuvengi.

¹¹Mvura zhinji yakafukidza vadzivisi vavo; hakuna mumwe wavo akapona.

¹²Ipapo vakatenda vimbiso dzake vakaimba vachimurumbidza.

¹³Asi vakakurumidza kukanganwa zvaakanga aita, uye vakasamirira kurayira kwake.

¹⁴Havana kuzvidzora pakukara kwavo mugwenga; vakaedza Mwari murenje.

¹⁵Saka akavapa zvavakakumbira, asi akatuma chirwere chinopedza muviri pamusoro pavo.

¹⁶Vakaitira Mozisi godo mumusasa, naAroni, akanga akatsaurirwa kuna Jehovha.

¹⁷Nyika yakazaruka ikamedza Dhatani; ikaviga boka raAbhiramu.

¹⁸Moto wakapfuta pakati pavateveri vavo; murazvo ukaparadza vakaipa.

¹⁹Vakaumba mhuru paHorebhi, vakanamata chifananidzo chakaumbwa.

²⁰Vakatsinhanisa kubwinya kwavo nomufananidzo wehando, inodya uswa.

²¹Vakakanganwa Mwari akavaponesa, uyo akanga aita zvinhu zvikuru muIjipiti,

²²mabasa anoshamisa munyika yaHamu namabasa anotyisa paGungwa Dzvuku.

²³Saka akati, achavaparadza, dai Mozisi, musanangurwa wake, asina kumira pamberi pake kuti adzore hasha dzake pakuvaparadza.

²⁴Ipapo vakazvidza nyika inofadza; havana kutenda zvaakavimbisa.

²⁵Vakanyunyuta vari mumatende avo vakasateerera Jehovha.

²⁶Saka akapika akasimudza ruoko rwake kuti achavaparadza murenje,

²⁷achaparadza zvizvarwa zvavo pakati pendudzi, agovaparadzira munyika dzose.

²⁸Vakazvibatanidza pamwe chete naBhaari wePeori, uye vakadya zvibayiro zvakabayirwa vamwari vakafa.

²⁹Vakatsamwisa Jehovha namabasa avo akaipa, uye denda rikavapo pakati pavo.

³⁰Asi Finehasi akasimuka, akaita zvakarurama, denda rikaguma.

³¹Izvozvo zvakanzi kwaari kururama kusvikira kuzvizvarwa nezvizvarwa nokusingaperi.

³²Vakatsamwisa Jehovha pamvura zhinji yeMeribha, uye Mozisi akaoneswa nhamo nokuda kwavo;

³³nokuti vakamukira Mweya waMwari, Mozisi akataura nehasha nomuromo wake.

³⁴Havana kuparadza marudzi sokurayirwa kwavakaitwa naJehovha,

³⁵asi vakavhengana nendudzi, vakatora tsika dzavo.

³⁶Vakanamata zvifananidzo zvavo, izvo zvakazova musungo kwavari.

³⁷Vakabayira vanakomana vavo navanasikana vavo kumadhimoni.

³⁸Vakateura ropa risina mhosva, iro ropa ravanakomana vavo neravanasikana vavo, vavakabayira kuzvifananidzo zveKenani, nyika ikasvibiswa neropa ravo.

³⁹Vakazvisvibisa nezvavakaita; vakazviitisa ufeve namabasa avo.

⁴⁰Naizvozvo Jehovha akatsamwira vanhu vake, akasema nhaka yake.

⁴¹Akavaisa mumaoko endudzi, uye vakatongwa navavengi vavo.

⁴²Vavengi vavo vakavadzvinyirira, uye vakavaisa pasi pesimba ravo.

⁴³Akavarwira kakawanda, asi ivo vakanga vakarerekera pakumumukira vakaparadzwa muchivi chavo.

⁴⁴Asi akatarisa kutambudzika kwavo paakanzwa kuchema kwavo;

⁴⁵akarangarira sungano yake nokuda kwavo, uye akazvidemba nokuda kworudo rwake rukuru.

⁴⁶Akaita kuti vanzwirwe tsitsi navose vakavatapa.

⁴⁷Tiponesei, imi Jehovha Mwari wedu, uye mutiunganidze kubva kundudzi, kuti tigovonga zita renyu dzvene. Tigofara mukurumbidzwa kwenyu.

⁴⁸Jehovha ngaarumbidzwe, iye Mwari waIsraeri, kubva pakusingaperi kusvikira pakusingaperi. Vanhu vose ngavati, “Ameni!” Rumbidzai Jehovha.