Read Bhaibheri Dzvene MuChiShona Chanhasi Mapisarema 107 Bible Online

Mapisarema 107 - Bhaibheri Dzvene MuChiShona Chanhasi bible

Mapisarema 107

¹Vongai Jehovha, nokuti akanaka; rudo rwake runogara nokusingaperi.

²Vakadzikinurwa naJehovha ngavadaro, vaakadzikinura muruoko rwomuvengi,

³avo vaakaunganidza kubva panyika dzose, kubva kumabvazuva nokumavirira, nokumusoro nezasi.

⁴Vamwe vakadzungaira murenje nomugwenga, vachishayiwa nzira yokuenda kuguta kwavangagara.

⁵Vakava nenzara nenyota, uye upenyu hwavo hwakanga hwoparara.

⁶Ipapo vakachema kuna Jehovha pakutambudzika kwavo, akavarwira pakutambura kwavo.

⁷Akavafambisa nenzira yakarurama kuenda kuguta ravaizogara.

⁸Vanhu ngavavonge Jehovha nokuda kworudo rwake rusingaperi, uye nokuda kwamabasa anoshamisa aakavaitira,

⁹nokuti anogutsa vane nyota, uye vane nzara anovazadza nezvakanaka.

¹⁰Vamwe vakagara murima nokusurikirwa kwakadzama, vari vasungwa vanotambudzika muzvisungo zvamatare,

¹¹nokuti vakanga vamukira mashoko aMwari uye vakazvidza kurayira kweWokumusoro-soro.

¹²Saka akaita kuti vashande zvinorwadza; vakagumburwa, uye pakanga pasina anovabatsira.

¹³Ipapo vakachema kuna Jehovha pakutambudzika kwavo, uye akavaponesa pakutambura kwavo.

¹⁴Akavabudisa murima nomukusviba kwakadzika dzika, uye akadambura ngetani dzavo.

¹⁵Vanhu ngavavonge Jehovha nokuda kworudo rwake rusingaperi, uye namabasa ake anoshamisa aakavaitira,

¹⁶nokuti anopwanya masuo endarira, uye akagura mazariro esimbi.

¹⁷Vamwe vakava mapenzi nokuda kwenzira dzavo dzokumukira, uye vakatambudzwa kwazvo nokuda kwezvakaipa zvavo.

¹⁸Vakasema zvokudya zvose, uye vakaswedera pamasuo orufu.

¹⁹Ipapo vakachema kuna Jehovha pakutambudzika kwavo, uye akavaponesa pakutambura kwavo.

²⁰Akatuma shoko rake uye akavaporesa; akavanunura kubva paguva.

²¹Vanhu ngavavonge Jehovha nokuda kworudo rwake rusingaperi, uye namabasa ake anoshamisa aakavaitira.

²²Ngavabayire zvibayiro zvokuvonga, uye vareve zvamabasa ake nenziyo dzomufaro.

²³Vamwe vakafamba rwendo pagungwa nezvikepe; vakanga vari vashambadziri pamvura zhinji.

²⁴Vakaona mabasa aJehovha, mabasa ake anoshamisa pakadzika.

²⁵Nokuti akataura uye akamutsa dutu rikasimudza mafungu.

²⁶Vakaenda kumusoro kumatenga vakaendawo pasi kwakadzika; mukutambudzika kwavo kushinga kwavo kwakanyongodeka.

²⁷Vakandeya vakadzedzereka savanhu vadhakwa; vakasvika pakupererwa namazano.

²⁸Ipapo vakachema kuna Jehovha pakutambudzika kwavo, uye akavabudisa pakutambura kwavo.

²⁹Akanyaradza dutu remhepo nezevezeve; mafungu egungwa akanyarara kuti mwiro.

³⁰Vakafara parakadzikama, uye akavatungamirira kwakachengetedzeka kwavaida.

³¹Vanhu ngavavonge Jehovha nokuda kworudo rwake rusingaperi, uye namabasa ake anoshamisa aakaitira vanhu.

³²Ngavamukudze paungano yavanhu, uye vamurumbidze pagungano ramakurukota.

³³Akashandura nzizi dzikava gwenga, hova dzinoerera dzikava nyika ine nyota,

³⁴uye nyika yezvibereko ikava gwenga romunyu, nokuda kwezvakaipa zvavaigaramo.

³⁵Akashandura gwenga rikava madziva emvura, nenyika yakaoma ikava zvitubu zvinoerera;

³⁶ndipo paakagarisa vane nzara, uye vakavaka guta ravangagara.

³⁷Vakadyara minda, uye vakasima minda yemizambiringa, ikabereka mukohwo wakanaka;

³⁸akavaropafadza, uye akavawanza zvikuru, uye haana kutendera zvipfuwo zvavo kuparara.

³⁹Ipapo vakava vashoma, uye vakaninipiswa vakadzvinyirirwa, nenjodzi uye nokusuwa;

⁴⁰iye anodurura kuzvidzwa pamusoro pamakurukota, akaita kuti vadzungaire musango risina nzira.

⁴¹Akasimudza vanoshayiwa kubva mukutambudzika kwavo, uye akawedzera mhuri dzavo samapoka amakwai.

⁴²Vakarurama vanozviona vagofara, asi vakaipa vose vanodzivirwa miromo yavo.

⁴³Ani naani akachenjera ngaachengete zvinhu izvi, uye arangarire rudo rukuru rwaJehovha.