Read Bhaibheri Dzvene MuChiShona Chanhasi Mapisarema 109 Bible Online

Mapisarema 109 - Bhaibheri Dzvene MuChiShona Chanhasi bible

Mapisarema 109

¹Kumutungamiri wokuimba. Pisarema raDhavhidhi. Haiwa Mwari, imi wandinorumbidza, regai kunyarara,

²nokuti vanhu vakaipa vanonyengera vakandishamira miromo yavo; vakataura nhema pamusoro pangu nendimi dzavo.

³Vakandikomba namashoko okuvenga; vanorwa neni pasina mhosva.

⁴Pachinzvimbo choushamwari hwangu navo, vanondipa mhosva, asi ini ndiri munhu wokunyengetera.

⁵Vanonditsivira zvakaipa pane zvakanaka, uye vanondivengera ushamwari hwangu.

⁶Tumai munhu akaipa kuti apikisane naye; mupomeri ngaamire kuruoko rwake rworudyi.

⁷Paanotongwa, ngaawanikwe ane mhosva, uye minyengetero yake ngaimupe mhaka.

⁸Mazuva ake ngaave mashoma; mumwe ngaatore nzvimbo youkuru hwake.

⁹Vana vake ngavave nherera, uye mukadzi wake ave chirikadzi.

¹⁰Vana vake ngavave vapemhi vanodzungaira; ngavadzingwe vabve mumatongo emisha yavo.

¹¹Waakakwereta ngaatore zvose zvaanazvo; vatorwa ngavapambe zvose zvaakashandira.

¹²Ngakurege kuva neanomunzwira ngoni kana kunzwira tsitsi nherera dzake.

¹³Zvizvarwa zvake ngazvirove, mazita avo adzimwe parudzi runotevera.

¹⁴Mhosva yamadzibaba ake ngairangarirwe pamberi paJehovha; chivi chamai vake ngachirege kumbodzimwa.

¹⁵Zvivi zvavo ngazvirambe zviri pamberi paJehovha, kuti aparadze chirangaridzo chavo panyika.

¹⁶Nokuti haana kumbofunga kuita zvakanaka, asi akavhima varombo kusvika parufu, vanoshayiwa navane mwoyo yakaputsika.

¹⁷Aifarira kutaura chituko, ngachichiuya pamusoro pake; iye asina kufadzwa nokuropafadza, ngakuve kure naye.

¹⁸Aifuka kutuka senguo yake; zvakapinda mumuviri wake semvura, nomumapfupa ake samafuta.

¹⁹Ngazvive sejasi rakamonerwa paari, sebhanhire rakasungirirwa paari nokusingaperi.

²⁰Uyu ngauve muripo waJehovha kuvapomeri vangu, kuna avo vanotaura zvakaipa pamusoro pangu.

²¹Asi imi, Ishe Jehovha, ndiitirei zvakanaka nokuda kwezita renyu; ndirwirei, kubudikidza nokunaka kworudo rwenyu.

²²Nokuti ndiri murombo uye ndinoshayiwa, uye mwoyo wangu wakuvara mukati mangu.

²³Ndinopera somumvuri wamadekwana; ndinozunzwa semhashu.

²⁴Mabvi angu apera simba nokutsanya; muviri wangu waonda uye ndaonda kwazvo.

²⁵Ndiri chinhu chinosekwa navapomeri vangu; pavanondiona, vanodzungudza misoro yavo.

²⁶Ndibatsirei, imi Jehovha Mwari wangu; ndiponesei zvakafanira rudo rwenyu.

²⁷Ngavazive kuti ndirwo ruoko rwenyu, kuti imi, iyemi Jehovha, makazviita.

²⁸Ivo vangatuka havo, asi imi mucharopafadza; vachanyadziswa pavanorwisa, asi muranda wenyu achafara.

²⁹Vapomeri vangu vachafukidzwa nenyadzi, uye vachaputirwa nokunyara sokunge nejasi.

³⁰Ndicharumbidza Jehovha nomuromo wangu zvikuru; paungano huru, ndichamurumbidza.

³¹Nokuti anomira kuruoko rworudyi rwouyo anoshayiwa, kuti amuponese pane avo vanomupomera mhosva.