Read Bhaibheri Dzvene MuChiShona Chanhasi Mapisarema 116 Bible Online

Mapisarema 116 - Bhaibheri Dzvene MuChiShona Chanhasi bible

Mapisarema 116

¹Ndinoda Jehovha, nokuti akanzwa inzwi rangu; akandinzwira tsitsi pakuchema kwangu.

²Nokuti akarerekera nzeve yake kwandiri, ndichadana kwaari mazuva ose oupenyu hwangu.

³Misungo yorufu yakandipinganidza, kurwadza kweguva kwakauya pamusoro pangu; ndakakundwa nenhamo nokusuwa.

⁴Ipapo ndakadana kuzita raJehovha ndikati, “Haiwa Jehovha, ndiponesei!”

⁵Jehovha ane nyasha uye akarurama; Mwari wedu azere netsitsi.

⁶Jehovha anodzivirira vakatendeka pamwoyo; pandakanga ndiri pakushayiwa kukuru, iye akandiponesa.

⁷Haiwa mweya wangu, chizorora zvakare, nokuti Jehovha akakuitira zvakanaka.

⁸Nokuti imi, iyemi Jehovha, makarwira mweya wangu parufu, meso angu pamisodzi, uye makumbo angu pakugumburwa,

⁹kuti ndifambe pamberi paJehovha munyika yavapenyu.

¹⁰Ndakatenda; naizvozvo ndakati, “Ndiri kutambudzika kwazvo.”

¹¹Uye pakuvhunduka kwangu ndakati, “Vanhu vose vanoreva nhema.”

¹²Ndingaripira seiko Jehovha pamusoro pokunaka kwake kwose kwandiri?

¹³Ndichasimudza mukombe woruponeso ndigodana kuzita raJehovha.

¹⁴Ndichazadzisa mhiko dzangu kuna Jehovha, pamberi pavanhu vake vose.

¹⁵Chinhu chinokosha pamberi paJehovha ndirwo rufu rwavatsvene vake.

¹⁶Haiwa Jehovha, zvirokwazvo ndiri muranda wenyu; ndiri muranda wenyu, mwanakomana womurandakadzi wenyu; makandisunungura pangetani dzangu.

¹⁷Ndichabayira chipo chokuvonga kwamuri, uye ndichadana kuzita raJehovha.

¹⁸Ndichazadzisa mhiko dzangu kuna Jehovha, pamberi pavanhu vake vose,

¹⁹pavanze dzeimba yaJehovha, mukati mako, iwe Jerusarema. Rumbidzai Jehovha.