Read Bhaibheri Dzvene MuChiShona Chanhasi Mapisarema 118 Bible Online

Mapisarema 118 - Bhaibheri Dzvene MuChiShona Chanhasi bible

Mapisarema 118

¹Vongai Jehovha, nokuti akanaka; rudo rwake runogara nokusingaperi.

²Israeri ngaati, “Rudo rwake runogara nokusingaperi.”

³Imba yaAroni ngaiti, “Rudo rwake runogara nokusingaperi.”

⁴Avo vanotya Jehovha ngavati, “Rudo rwake runogara nokusingaperi.”

⁵Mukurwadziwa kwangu ndakadana kuna Jehovha, uye akandipindura nokundisunungura.

⁶Jehovha aneni; handingatyi. Munhu angandiiteiko?

⁷Jehovha aneni; ndiye mubatsiri wangu. Ndichatarira vavengi vangu nokukunda.

⁸Zviri nani kutizira kuna Jehovha pano kuvimba nomunhu.

⁹Zviri nani kutizira kuna Jehovha pano kuvimba namachinda.

¹⁰Ndudzi dzose dzakandikomba, asi ndakavaparadza muzita raJehovha.

¹¹Vakandikomba pamativi ose, asi ndakavaparadza muzita raJehovha.

¹²Vakandimomotera senyuchi, asi vakakurumidza kufa seminzwa inotsva, ndakavaparadza muzita raJehovha.

¹³Ndakasundidzirwa shure uye ndikada kuwa, asi Jehovha akandibatsira.

¹⁴Jehovha ndiye simba rangu norwiyo rwangu; ndiye ava ruponeso rwangu.

¹⁵Kupembera kwomufaro nokukunda kunonzwika mumatende avakarurama kuchiti: “Ruoko rworudyi rwaJehovha rwakaita zvinhu zvikuru!

¹⁶Ruoko rworudyi rwaJehovha rwakasimudzirwa kumusoro; ruoko rworudyi rwaJehovha rwakaita zvinhu zvikuru!”

¹⁷Handingafi asi ndichararama, uye ndichaparidza zvakaitwa naJehovha.

¹⁸Jehovha akandiranga kwazvo, asi haana kundiisa kurufu.

¹⁹Ndizarurireiwo masuo okururama; ndichapinda ndigovonga Jehovha.

²⁰Iri ndiro suo raJehovha panopinda navakarurama.

²¹Ndichakuvongai, nokuti makandipindura; makava ruponeso rwangu.

²²Dombo rakarambwa navavaki ndiro rakazova musoro wekona;

²³Jehovha akaita izvi, uye zvinoshamisa pamberi pedu.

²⁴Iri ndiro zuva rakaitwa naJehovha; ngatifarei kwazvo tifarisise mariri.

²⁵Haiwa Jehovha, tiponesei; haiwa Jehovha, tipeiwo kubudirira.

²⁶Akaropafadzwa uyo anouya muzita raJehovha. Tiri mumba maJehovha tinokuropafadzai.

²⁷Jehovha ndiye Mwari, uye akaita kuti chiedza chake chivhenekere pamusoro pedu. Namatavi muruoko, pinda mumudungwe ubatane navamwe vari kuenda kunyanga dzearitari.

²⁸Imi muri Mwari wangu, uye ndichakuvongai; ndimi Mwari wangu, uye ndichakukudzai.

²⁹Vongai Jehovha, nokuti akanaka; rudo rwake runogara nokusingaperi.