Read Bhaibheri Dzvene MuChiShona Chanhasi Mapisarema 119 Bible Online

Mapisarema 119 - Bhaibheri Dzvene MuChiShona Chanhasi bible

Mapisarema 119

¹Vakaropafadzwa avo vane nzira isina chaingapomerwa, vanofamba mumurayiro waJehovha.

²Vakaropafadzwa avo vanochengeta zvaakatema, vanomutsvaka nomwoyo wavo wose.

³Havaiti chinhu chakaipa; vanofamba munzira yake.

⁴Imi makaisa zvirevo zvinofanira kuteererwa.

⁵Haiwa, dai nzira dzangu dzakasimba pakuteerera zvirevo zvenyu!

⁶Ipapo handaizonyadziswa pandinorangarira mirayiro yenyu.

⁷Ndichakurumbidzai nomwoyo wakarurama, sezvo ndichidzidza mirayiro yenyu yakarurama.

⁸Ndichateerera mitemo yenyu; regai kundirasa zvachose.

⁹Ko, jaya ringanatsa nzira yaro nei? Nokurarama sezvinoreva shoko renyu.

¹⁰Ndinokutsvakai nomwoyo wangu wose; musandirega ndichitsauka pamirayiro yenyu.

¹¹Shoko renyu ndakariviga mumwoyo mangu, kuti ndirege kukutadzirai.

¹²Imi munofanira kukudzwa, Jehovha; ndidzidzisei mitemo yenyu.

¹³Nemiromo yangu ndichataurazve mirayiro yose inobva pamuromo wenyu.

¹⁴Ndinofarira kutevera zvirevo zvenyu, somunhu anofarira pfuma huru.

¹⁵Ndinofungisisa zvirevo zvenyu, uye ndinorangarira nzira dzenyu.

¹⁶Ndinofarira mitemo yenyu; handingakanganwi shoko renyu.

¹⁷Itirai muranda wenyu zvakanaka, ndigorarama; ndichateerera shoko renyu.

¹⁸Ndisvinudzei meso angu kuti ndione. Zvinhu zvinoshamisa zviri pamurayiro wenyu.

¹⁹Ndiri mutorwa panyika; regai kundivanzira mirayiro yenyu.

²⁰Mweya wangu wapedzwa nokushuva mitemo yenyu nguva dzose.

²¹Munotsiura vanozvikudza, avo vakatukwa, uye vanotsauka kubva pamirayiro yenyu.

²²Bvisai kwandiri kushorwa nokuzvidzwa, nokuti ndinochengeta zvirevo zvenyu.

²³Kunyange vatongi vachigara pamwe chete vachindireva, muranda wenyu achafungisisa mitemo yenyu.

²⁴Ndinofadzwa nezvirevo zvenyu; ndizvo zvinondipanga mazano.

²⁵Ndakaradzikwa pasi muguruva; chengetedzai upenyu hwangu sezvinoreva shoko renyu.

²⁶Ndakarevazve nzira dzangu imi mukandipindura; ndidzidzisei mitemo yenyu.

²⁷Itai kuti ndinzwisise zvirevo zvenyu; ipapo ndichafungisisa pamusoro pezvishamiso zvenyu.

²⁸Mweya wangu waziya nokusuwa; ndisimbisei sezvinoreva shoko renyu.

²⁹Ndibvisei panzira dzokunyengera; ndinzwirei nyasha kubudikidza nomurayiro wenyu.

³⁰Ndakasarudza nzira yechokwadi; ndakaisa mwoyo wangu pamurayiro wenyu.

³¹Haiwa Jehovha, ini ndichabatirira pazvirevo zvenyu; musandirega ndichinyadziswa.

³²Ndinomhanya munzira yomurayiro wenyu, nokuti makasunungura mwoyo wangu.

³³Ndidzidzisei, imi Jehovha, kutevera mitemo yenyu; ipapo ndichaichengeta kusvikira kumagumo.

³⁴Ndipei kunzwisisa, ndigochengeta murayiro wenyu uye ndigouteerera nomwoyo wangu wose.

³⁵Nditungamirirei munzira yemirayiro yenyu, nokuti imomo ndinowana mufaro.

³⁶Dzorerai mwoyo wangu pane zvamakatema kwete pakuchiva kwenyama.

³⁷Dzorai meso angu pazvinhu zvisina maturo; chengetedzai upenyu hwangu sezvinoreva shoko renyu.

³⁸Zadzisai zvamakapikira muranda wenyu, kuti mugotyiwa.

³⁹Bvisai kunyadziswa kwandaitya, nokuti mitemo yenyu yakanaka.

⁴⁰Ndinoshuva zvirevo zvenyu sei! Chengetedzai upenyu hwangu mukururama kwenyu.

⁴¹Rudo rwenyu rusingaperi ngaruuye kwandiri, Jehovha, noruponeso rwenyu sezvamakavimbisa;

⁴²ipapo ndichapindura vanondishora, nokuti ndinovimba neshoko renyu.

⁴³Regai kubvisa shoko rechokwadi pamuromo pangu, nokuti ndakaisa tariro yangu mumurayiro wenyu.

⁴⁴Ndichagara ndichiteerera murayiro wenyu, nokusingaperi-peri.

⁴⁵Ndichafamba-famba ndakasununguka, nokuti ndakatsvaka zvirevo zvenyu.

⁴⁶Ndichataura zvamakatema pamberi pamadzimambo, uye handinganyadziswi,

⁴⁷nokuti ndinofarira mirayiro yenyu nokuti ndinoida.

⁴⁸Ndinosimudzira maoko angu kumirayiro yenyu yandinoda, uye ndinofungisisa zvirevo zvenyu.

⁴⁹Rangarirai shoko renyu kumuranda wenyu, nokuti makandipa tariro.

⁵⁰Zvinondinyaradza pakutambura kwangu ndezvizvi: Vimbiso yenyu inochengetedza upenyu hwangu.

⁵¹Vanozvikudza vanondiseka vasingaregi, asi ini handitsauki pamurayiro wenyu.

⁵²Ndinorangarira mirayiro yenyu yekare, imi Jehovha, uye ndinonyaradzwa mairi.

⁵³Shungu dzinondibata nokuda kwavakaipa, vakasiya murayiro wenyu.

⁵⁴Mitemo yenyu ndiro dingindira rorwiyo rwangu pose pandinogara.

⁵⁵Haiwa, Jehovha, ndinorangarira zita renyu usiku, uye ndichachengeta murayiro wenyu.

⁵⁶Aya ndiwo anga ari maitiro angu: Ndinoteerera zvirevo zvenyu.

⁵⁷Haiwa, Jehovha, ndimi mugove wangu; ndakavimbisa kuteerera mashoko enyu.

⁵⁸Ndakatsvaka chiso chenyu nomwoyo wangu wose; ndinzwirei nyasha sezvamakavimbisa.

⁵⁹Ndakacherechedza nzira dzangu ndikadzorera tsoka dzangu kune zvamakatema.

⁶⁰Ndichakurumidza uye handinganonoki kuteerera mirayiro yenyu.

⁶¹Kunyange vakaipa vakandisunga namabote, handizokanganwi murayiro wenyu.

⁶²Ndinomuka pakati pousiku ndichikuvongai nokuda kwemirayiro yenyu yakarurama.

⁶³Ndiri shamwari yavose vanokutyai, nokuna vose vanotevera zvirevo zvenyu.

⁶⁴Haiwa Jehovha, nyika izere norudo rwenyu, ndidzidzisei zvirevo zvenyu.

⁶⁵Makaitira muranda wenyu zvakanaka, imi Jehovha, sezvakafanira shoko renyu.

⁶⁶Ndidzidzisei zivo nokutonga kwakanaka, nokuti ndakatenda mirayiro yenyu.

⁶⁷Pandakanga ndisati ndatambudzika, ndakatsauka, asi zvino ndinoteerera shoko renyu.

⁶⁸Imi makanaka, uye munoita zvakanaka; ndidzidzisei mitemo yenyu.

⁶⁹Kunyange vanozvikudza vakandipomera nhema, ndinochengeta zvamakatema nomwoyo wangu wose.

⁷⁰Mwoyo yavo yakasindimara uye hainzwisisi, asi ndinofarira murayiro wenyu.

⁷¹Zvakanga zvakanaka kuti nditambudzike, kuitira kuti ndigodzidza mitemo yenyu.

⁷²Murayiro unobva pamuromo wenyu unokosha kwandiri, kupfuura zviuru zvezvimedu zvesirivha negoridhe.

⁷³Maoko enyu akandisika uye akandiumba; ndipei kunzwisisa kuti ndigodzidza mirayiro yenyu.

⁷⁴Avo vanokutyai ngavafare pavanondiona, nokuti ndakaisa tariro yangu pashoko renyu.

⁷⁵Haiwa Jehovha, ndinoziva kuti mirayiro yenyu yakarurama, uye kuti makanditambudza mukutendeka kwenyu.

⁷⁶Rudo rwenyu rusingaperi ngarutinyaradze, maererano nechivimbiso chenyu kumuranda wenyu.

⁷⁷Tsitsi dzenyu ngadziuye kwandiri kuti ndirarame, nokuti murayiro wenyu ndiwo mufaro wangu.

⁷⁸Vanozvikudza ngavanyadziswe pakundikanganisira ndisina mhaka, asi ini ndichafungisisa zvirevo zvenyu.

⁷⁹Vanokutyai ngavadzokere kwandiri, ivo vanonzwisisa zvamakatema.

⁸⁰Mwoyo wangu ngaushaye chaungapomerwa pamitemo yenyu, kuti ndirege kunyadziswa.

⁸¹Mweya wangu unoziya nokuda kwekushuva ruponeso rwenyu, asi ndakaisa tariro yangu pashoko renyu.

⁸²Meso angu aneta nokutsvaga chivimbiso chenyu; ndinoti, “Muchandinyaradza riniko?”

⁸³Kunyange ndakaita sehomwe yewaini ndiri muutsi, handikanganwi mitemo yenyu.

⁸⁴Muranda wenyu acharindira kusvikira riniko? Mucharanga vatambudzi vangu riniko?

⁸⁵Vanozvikudza vakandicherera makomba, zvinopesana nomurayiro wenyu.

⁸⁶Mirayiro yenyu yose yakavimbika, ndibatsirei, nokuti vanhu vanonditambudza ndisina mhaka.

⁸⁷Vakanga voda kundibvisa panyika, asi handina kusiya zvamakatema.

⁸⁸Chengetedzai upenyu hwangu zvakafanira rudo rwenyu, uye ini ndichateerera zvirevo zvomuromo wenyu.

⁸⁹Haiwa Jehovha, shoko renyu rinogara nokusingaperi; rinomira rakasimba kudenga denga.

⁹⁰Kutendeka kwenyu kunoramba kuripo kusvikira kuzvizvarwa zvose; makasimbisa nyika uye inogara nokusingaperi.

⁹¹Mirayiro yenyu iripo kusvikira iye nhasi, nokuti zvinhu zvose zvinokushumirai.

⁹²Dai murayiro wenyu wanga usiri mufaro wangu, ndingadai ndakafira mumatambudziko angu.

⁹³Handichazokanganwi zvamakatema, nokuti nazvo makachengetedza upenyu hwangu.

⁹⁴Ndiponesei, nokuti ndiri wenyu; ndakatsvaka zvamakatema.

⁹⁵Vakaipa vakarindira kundiparadza, asi ini ndichafunga zvirevo zvenyu.

⁹⁶Ndinoona kuguma kwezvose zvakakwana, asi mirayiro yenyu haina magumo.

⁹⁷Haiwa, ndinoda murayiro wenyu sei! Ndinoufungisisa zuva rose.

⁹⁸Mirayiro yenyu inoita kuti ndive akachenjera kupfuura vavengi vangu, nokuti inogara neni nguva dzose.

⁹⁹Ndinonzwisisa zvakawanda kupfuura vadzidzisi vangu, nokuti ndinofungisisa pamusoro pezvamakatema.

¹⁰⁰Ndinonzwisisa zvikuru kupfuura vakuru, nokuti ndinoteerera zvirevo zvenyu.

¹⁰¹Ndakadzora tsoka dzangu panzira dzose dzakaipa kuti nditeerere shoko renyu.

¹⁰²Handina kubva pamirayiro yenyu, nokuti imi pachenyu makandidzidzisa.

¹⁰³Mashoko enyu anotapira seiko pakuaravira, anotapira kukunda uchi mumukanwa mangu!

¹⁰⁴Ndinowana kunzwisisa kubva pazvirevo zvenyu; naizvozvo ndinovenga nzira dzose dzakaipa.

¹⁰⁵Shoko renyu ndiwo mwenje wetsoka dzangu, nechiedza chenzira yangu.

¹⁰⁶Ndakaita mhiko ndikaisimbisa, kuti ndichatevera mirayiro yenyu yakarurama.

¹⁰⁷Ndakatambudzika kwazvo; chengetedzai upenyu hwangu, imi Jehovha, zvakafanira shoko renyu.

¹⁰⁸Haiwa Jehovha, gamuchirai henyu kurumbidza kwomuromo wangu, mugondidzidzisa mirayiro yenyu.

¹⁰⁹Kunyange ndichiramba ndakabata upenyu hwangu mumaoko angu, handizokanganwi murayiro wenyu.

¹¹⁰Vakaipa vakanditeya nomusungo, asi handina kutsauka pazvirevo zvenyu.

¹¹¹Zvirevo zvenyu inhaka yangu nokusingaperi; ndizvo mufaro womwoyo wangu.

¹¹²Mwoyo wangu wakagarira kuchengeta zvirevo zvenyu, kusvikira kumagumo.

¹¹³Ndinovenga vanhu vane mwoyo miviri, asi ndinoda murayiro wenyu.

¹¹⁴Imi muri utiziro hwangu nenhoo yangu; ndakaisa tariro yangu pashoko renyu.

¹¹⁵Ibvai kwandiri, imi vaiti vezvakaipa, kuti ndichengete mirayiro yaMwari wangu!

¹¹⁶Nditsigirei sezvamakavimbisa, ipapo ndichararama; musarega tariro yangu ichidzimwa.

¹¹⁷Nditsigirei, ipapo ndicharwirwa; ndicharamba ndine hanya nemitemo yenyu.

¹¹⁸Munoramba vose vanotsauka pamitemo yenyu, nokuti kunyengera kwavo hakuna maturo.

¹¹⁹Vakaipa vose venyika munovaita sengura; naizvozvo ndinoda zvamakatema.

¹²⁰Nyama yangu inodedera nokuda kwokukutyai; ndinomira ndichitya mirayiro yenyu.

¹²¹Ndakaita zvakarurama nokururamisira; musandisiya mumaoko avadzvinyiriri vangu.

¹²²Itai kuti muranda wenyu agare zvakanaka; musarega vanozvikudza vachimudzvinyirira.

¹²³Meso angu aneta nokutsvaka ruponeso rwenyu, ndichitsvaga vimbiso yenyu yakarurama.

¹²⁴Itirai muranda wenyu zvinoringana norudo rwenyu, uye ndidzidzisei mitemo yenyu.

¹²⁵Ndiri muranda wenyu; ndipeiwo kunzvera kuti ndigonzwisisa zvamakatema.

¹²⁶Haiwa Jehovha, inguva yenyu yokubata; murayiro wenyu uri kuputswa.

¹²⁷Nokuti ndinoda mirayiro yenyu kupfuura goridhe, kupfuura goridhe rakanatswa,

¹²⁸uye nokuti ndinoti zvirevo zvenyu zvose zvakarurama, ndinovenga nzira dzose dzakaipa.

¹²⁹Zvirevo zvenyu zvinoshamisa; naizvozvo ndinozviteerera.

¹³⁰Kuzarurwa kweshoko renyu kunopa chiedza; kunopa kunzwisisa kuna vasina mano.

¹³¹Ndinoshamisa muromo wangu ndigodokwaira, ndichishuva mirayiro yenyu.

¹³²Dzokerai kwandiri mugondinzwira ngoni, sezvamunogara muchiita kuna avo vanoda zita renyu.

¹³³Rayirai nhambwe dzetsoka dzangu zviri maererano neshoko renyu; chivi ngachirege kunditonga.

¹³⁴Ndidzikinurei pakudzvinyirira kwavanhu, kuti ndigoteerera zvirevo zvenyu.

¹³⁵Chiso chenyu ngachipenye pamusoro pomuranda wenyu, uye ndidzidzisei mitemo yenyu.

¹³⁶Hova dzemisodzi dzinoerera dzichibva mumeso angu, nokuti murayiro wenyu hausi kuteererwa.

¹³⁷Haiwa Jehovha, imi makarurama, uye mirayiro yenyu yakarurama.

¹³⁸Zvirevo zvenyu zvamakadzika zvakarurama; zvakavimbika kwazvo.

¹³⁹Kushingaira kwangu kunondipedza, nokuti vavengi vangu havana hanya namashoko enyu.

¹⁴⁰Vimbiso dzenyu dzakaedzwa chose, uye muranda wenyu anodzida.

¹⁴¹Kunyange ndakaderedzwa uye ndichizvidzwa hangu, handikanganwi zvirevo zvenyu.

¹⁴²Kururama kwenyu kunogara nokusingaperi, uye murayiro wenyu ndowezvokwadi.

¹⁴³Nhamo namatambudziko zviri pamusoro pangu, asi mirayiro yenyu ndiwo mufaro wangu.

¹⁴⁴Zvirevo zvenyu zvinogara zvakarurama; ndipeiwo kunzwisisa kuti ndirarame.

¹⁴⁵Ndinodana nomwoyo wangu wose; haiwa Jehovha ndipindureiwo, uye ndichateerera mitemo yenyu.

¹⁴⁶Ndinodanidzira kwamuri, ndiponesei uye ndichachengeta zvamakatema.

¹⁴⁷Ndinomuka mambakwedza asati asvika ndigochemera kubatsirwa; ndakaisa tariro yangu pashoko renyu.

¹⁴⁸Meso angu anogara akasvinura panguva dzose dzousiku, kuti ndifungisise pamusoro pevimbiso dzenyu.

¹⁴⁹Inzwai inzwi rangu sezvakafanira rudo rwenyu; haiwa Jehovha, chengetedzai upenyu hwangu zviri maererano nemirayiro yenyu.

¹⁵⁰Vanoita mano akaipa vari pedyo, asi vari kure nomurayiro wenyu.

¹⁵¹Asi imi muri pedyo, Jehovha, uye mirayiro yenyu yose ndeyezvokwadi.

¹⁵²Ndakadzidza pane zvamakatema kare, kuti makazvisimbisa kuti zvigare nokusingaperi.

¹⁵³Tarirai kutambudzika kwangu mugondirwira, nokuti handina kukanganwa murayiro wenyu.

¹⁵⁴Miririrai mhosva yangu uye mundidzikinure; chengetedzai upenyu hwangu maererano nevimbiso yenyu.

¹⁵⁵Ruponeso rwuri kure navakaipa, nokuti havatsvaki mitemo yenyu.

¹⁵⁶Haiwa Jehovha, tsitsi dzenyu ihuru; chengetedzai upenyu hwangu maererano nemirayiro yenyu.

¹⁵⁷Vavengi vangu navanonditambudza vazhinji, asi handina kutsauka pane zvamakatema.

¹⁵⁸Ndinotarira kuna vasingatendi ndichisema, nokuti havateereri shoko renyu.

¹⁵⁹Tarirai madiro andinoita zvirevo zvenyu; haiwa Jehovha, chengetedzai upenyu hwangu, maererano norudo rwenyu.

¹⁶⁰Mashoko enyu ose ndeechokwadi; mirayiro yenyu yose yakarurama ndeyokusingaperi.

¹⁶¹Vatongi vanonditambudza ndisina mhaka, asi mwoyo wangu unodedera pashoko renyu.

¹⁶²Ndinofarira vimbiso yenyu kufanana nouyo anowana zvakapambwa zvizhinji.

¹⁶³Ndinovenga uye ndinosema nhema, asi ndinoda murayiro wenyu.

¹⁶⁴Ndinokurumbidzai kanomwe pazuva, nokuda kwemirayiro yenyu yakarurama.

¹⁶⁵Vanoda murayiro wenyu vano rugare rukuru, uye hakuna chingavagumbusa.

¹⁶⁶Haiwa Jehovha, ndakamirira ruponeso rwenyu, uye ndinotevera mirayiro yenyu.

¹⁶⁷Ndinoteerera zvirevo zvenyu, nokuti ndinozvida zvikuru.

¹⁶⁸Ndinoteerera zvirevo zvenyu nezvamakatema, nokuti nzira dzangu dzose dzinozivikanwa nemi.

¹⁶⁹Dai kuchema kwangu kwasvika pamberi penyu, imi Jehovha; ndipeiwo kunzwisisa maererano neshoko renyu.

¹⁷⁰Kukumbira kwangu dai kwasvika pamberi penyu; ndirwirei maererano nevimbiso yenyu.

¹⁷¹Miromo yangu dai yafashukira nerumbidzo, nokuti munondidzidzisa mitemo yenyu.

¹⁷²Rurimi rwangu dai rwaimba nezveshoko renyu, nokuti mirayiro yenyu yose yakarurama.

¹⁷³Ruoko rwenyu dai rwagadzirira kundibatsira, nokuti ndakasarudza zvirevo zvenyu.

¹⁷⁴Haiwa Jehovha, ndinoshuva ruponeso rwenyu, uye murayiro wenyu ndiwo mufaro wangu.

¹⁷⁵Regai ndirarame kuti ndigokurumbidzai, uye dai mirayiro yenyu yandibatsira.

¹⁷⁶Ndakatsauka segwai rakarasika. Tsvakai muranda wenyu, nokuti handina kukanganwa mirayiro yenyu.