Read Bhaibheri Dzvene MuChiShona Chanhasi Mapisarema 135 Bible Online

Mapisarema 135 - Bhaibheri Dzvene MuChiShona Chanhasi bible

Mapisarema 135

¹Rumbidzai Jehovha. Rumbidzai zita raJehovha; murumbidzei, imi varanda vaJehovha,

²imi munoshumira muimba yaJehovha, muvanze dzeimba yaMwari wedu.

³Rumbidzai Jehovha, nokuti Jehovha akanaka; imbirai zita rake nziyo dzokurumbidza, nokuti ndizvo zvakanaka.

⁴Nokuti Jehovha akasarudza Jakobho kuti ave wake, naIsraeri kuti ave pfuma yake.

⁵Ndinoziva kuti Jehovha mukuru, uye kuti Ishe wedu mukuru kupfuura vamwari vose.

⁶Jehovha anoita zvose zvinomufadza, kudenga napasi, nomumakungwa napakadzika pose.

⁷Anoita kuti makore akwire kubva kumagumo enyika; anotumira mheni nemvura, uye anobudisa mhepo kubva mumatura ake.

⁸Ndiye akaparadza matangwe eIjipiti, matangwe avanhu neemhuka.

⁹Akatumira zviratidzo nezvishamiso zvake mukati mako, iwe Ijipiti, pamusoro paFaro navaranda vake vose.

¹⁰Akaparadza ndudzi dzakawanda uye akauraya madzimambo ane simba,

¹¹Sihoni mambo weAmori, Ogi mambo weBhashani namadzimambo ose eKenani,

¹²akapa nyika yavo kuti ive nhaka, nhaka yavanhu vake Israeri.

¹³Haiwa Jehovha, zita renyu rinogara nokusingaperi, mukurumbira wenyu, imi Jehovha, kuzvizvarwa zvose.

¹⁴Nokuti Jehovha achapupurira vanhu vake uye achava nenyasha pamusoro pavaranda vake.

¹⁵Zvifananidzo zvendudzi isirivha negoridhe, zvakaitwa namaoko avanhu.

¹⁶Zvine miromo, asi hazvigoni kutaura, zvina meso, asi hazvigoni kuona;

¹⁷nenzeve, asi hazvigoni kunzwa, uye hamuna kufema mumuromo mazvo.

¹⁸Vaya vanozviita vachafanana nazvo, saizvozvowo, naivo vanovimba nazvo.

¹⁹Haiwa imi imba yaIsraeri, rumbidzai Jehovha; haiwa imba yaAroni, rumbidzai Jehovha;

²⁰Haiwa imi imba yaRevhi, rumbidzai Jehovha; imi vanomutya, rumbidzai Jehovha.

²¹Jehovha ngaarumbidzwe kubva kuZioni, iye agere muJerusarema. Rumbidzai Jehovha.