Read Bhaibheri Dzvene MuChiShona Chanhasi Mapisarema 139 Bible Online

Mapisarema 139 - Bhaibheri Dzvene MuChiShona Chanhasi bible

Mapisarema 139

¹Kumutungamiri wokuimba. Pisarema raDhavhidhi. Haiwa Jehovha, makandinzvera uye munondiziva.

²Munoziva nguva yandinogara neyandinosimuka; munonzwisisa pfungwa dzangu muri kure.

³Munonzvera kubuda kwangu nokuvata kwangu pasi; munoziva nzira dzangu dzose.

⁴Shoko risati rava parurimi rwangu, tarirai, imi Jehovha, munoriziva rose.

⁵Munondikomberedza shure nemberi; makaisa ruoko rwenyu pamusoro pangu.

⁶Kuziva kwakadai kunondishamisa, kwakanyanya kukwirira zvokuti handingasvikiri.

⁷Ndingaendepiko kuti ndibve paMweya wenyu? Ndingatizirepiko kuti ndibve pamberi penyu?

⁸Kana ndikakwira kumatenga, imi muriko; kana ndikawarira mubhedha wangu kwakadzika, imi muriko.

⁹Kana ndikasimuka namapapiro amambakwedza, kana ndikandogara kumagumo egungwa,

¹⁰kunyange ipapo ruoko rwenyu runondisesedza, ruoko rwenyu rworudyi runondimbundikira.

¹¹Kana ndikati, “Zvirokwazvo rima richandivanza, uye chiedza chinondikomberedza chichava usiku kwandiri,”

¹²kunyange rima haringavi rima kwamuri; usiku huchapenya samasikati, nokuti rima rakaita sechiedza kwamuri.

¹³Nokuti imi makasika zvomukatikati mangu; makandiruka ndiri mudumbu ramai vangu.

¹⁴Ndinokurumbidzai nokuti ndakaitwa nomutoo unotyisa uye unoshamisa; mabasa enyu anoshamisa, ndinonyatsozviziva kwazvo.

¹⁵Mapfupa angu akanga asina kuvanzika kwamuri, pandakanga ndaiswa munzvimbo yakavanda. Pandakarukwa ndiri pakadzika penyika,

¹⁶meso enyu akaona muviri usati waumbwa. Mazuva ose andakarongerwa akanga akanyorwa mubhuku renyu, rimwe rawo risati ravapo.

¹⁷Mirangariro yenyu inokosha sei kwandiri, imi Mwari! Yakakura sei pakuverengwa kwayo!

¹⁸Dai ndaiverenga, ingadai yaikunda tsanga dzejecha pakuwanda. Pandinopepuka, ndinenge ndinemi.

¹⁹Dai mukangouraya vakaipa, imi Mwari! Endai kure neni, imi vanhu vokuteura ropa!

²⁰Ivo vanotaura nemi nomurangariro wakaipa; vadzivisi venyu vanoshandisa zita renyu zvakaipa.

²¹Ko, ini handivengi vanokuvengai here, imi Jehovha, nokusema vaya vanokumukirai?

²²Handina chimwe chinhu asi kuvavenga ivo; ndinovati vavengi vangu.

²³Ndinzverei, imi Mwari, mugoziva mwoyo wangu; ndiedzei mugoziva kushuva kwendangariro dzangu.

²⁴Muone kana musina nzira yakaipa mandiri, mugondifambisa munzira isingaperi.