Read Bhaibheri Dzvene MuChiShona Chanhasi Mapisarema 145 Bible Online

Mapisarema 145 - Bhaibheri Dzvene MuChiShona Chanhasi bible

Mapisarema 145

¹Pisarema rokurumbidza, raDhavhidhi. Ndichakukudzai, Mwari wangu Mambo; ndicharumbidza zita renyu nokusingaperi-peri.

²Ndichakurumbidzai mazuva ose, uye ndichakudza zita renyu nokusingaperi-peri.

³Jehovha mukuru uye akafanira kurumbidzwa; ukuru hwake hahunganzverwi nomunhu.

⁴Rumwe rudzi rucharumbidza mabasa enyu kuno rumwe; vachareva zvamabasa enyu esimba.

⁵Vachataura nezvokunaka kwokubwinya kwoumambo hwenyu, uye ndichafungisisa pamusoro pemabasa enyu anoshamisa.

⁶Vanhu vachataura nezvesimba ramabasa enyu anotyisa, uye ndichaparidza mabasa enyu makuru.

⁷Vachapemberera kuwanda kwokunaka kwenyu, uye vachaimba nomufaro pamusoro pokururama kwenyu.

⁸Jehovha ane nyasha uye ane tsitsi, anononoka kutsamwa uye azere norudo.

⁹Jehovha akanaka kuna vose; uye ane nyasha pamusoro pezvose zvaakaita.

¹⁰Zvose zvamakaita zvichakurumbidzai, imi Jehovha; vatsvene venyu vachakukudzai.

¹¹Vachataura nezvokubwinya kwoumambo hwenyu, uye vachataura nezvesimba renyu,

¹²kuitira kuti vanhu vose vazive nezvamabasa enyu makuru, nokunaka kwokubwinya kwoumambo hwenyu.

¹³Umambo hwenyu umambo hwokusingaperi, uye ushe hwenyu hunogara kusvikira kuzvizvarwa zvose. Jehovha akatendeka pavimbiso dzake dzose, uye ane rudo kuzvinhu zvose zvaakaita.

¹⁴Jehovha anotsigira vose vanowa, uye anosimudza vose vakakotamiswa pasi.

¹⁵Meso avose anotarira kwamuri, uye munovapa zvokudya zvavo nenguva yakafanira.

¹⁶Munozarura ruoko rwenyu, uye munogutsa zvisikwa zvipenyu zvose nezvazvinoda.

¹⁷Jehovha akarurama panzira dzake dzose, uye ane rudo kuzvinhu zvose zvaakaita.

¹⁸Jehovha ari pedyo navose vanodana kwaari, kuna vose vanodana kwaari muchokwadi.

¹⁹Anozadzisa zvido zvaavo vanomutya; anonzwa kuchema kwavo uye anovaponesa.

²⁰Jehovha anochengeta vose vanomuda, asi achaparadza vakaipa vose.

²¹Muromo wangu uchataura kurumbidzwa kwaJehovha. Zvisikwa zvose ngazvirumbidze zita rake dzvene nokusingaperi-peri.