Read Bhaibheri Dzvene MuChiShona Chanhasi Mapisarema 147 Bible Online

Mapisarema 147 - Bhaibheri Dzvene MuChiShona Chanhasi bible

Mapisarema 147

¹Rumbidzai Jehovha. Zvakanaka sei kuimbira Mwari wedu nziyo dzokurumbidza, zvinofadza uye zvakafanira sei kumurumbidza!

²Jehovha anovaka Jerusarema; anounganidza vakadzingwa vaIsraeri.

³Anoporesa vane mwoyo yakaputsika, uye anosunga maronda avo.

⁴Anotara kuwanda kwenyeredzi, anodana imwe neimwe nezita rayo.

⁵Ishe wedu mukuru uye ane simba guru; kunzwisisa kwake hakuperi.

⁶Jehovha anotsigira vanozvininipisa, asi anowisira pasi vakaipa.

⁷Imbirai Jehovha nokuvonga; muimbire Mwari wedu nziyo dzokurumbidza nembira.

⁸Anofukidza denga namakore; anopa nyika mvura, uye anomeresa uswa pazvikomo.

⁹Anopa mombe zvokudya navana vamakunguo pavanochema.

¹⁰Mufaro wake hausi musimba rebhiza, uye mufaro wake hausi pamakumbo omunhu;

¹¹Jehovha anofadzwa naavo vanomutya, vanoisa tariro yavo parudo rwake rusingaperi.

¹²Kudza Jehovha, iwe Jerusarema; rumbidza Mwari wako, iwe Zioni,

¹³nokuti anosimbisa mazariro amasuo ako, uye anoropafadza vanhu vako vari mauri.

¹⁴Anopa rugare pamiganhu yako, uye anokugutsa nezviyo zvakaisvonaka.

¹⁵Anotuma murayiro wake kunyika; shoko rake rinomhanya kwazvo.

¹⁶Anowarira chando samakushe amakwai, uye anoparadzira chando samadota.

¹⁷Anokanda chimvuramabwe pasi sezvimedu. Ndianiko angamira kana chando chake charova?

¹⁸Anotuma shoko rake rigozvinyungudisa; anomutsa mhepo yake, mvura zhinji igoerera.

¹⁹Akazarurira Jakobho shoko rake, mirayiro yake nezvirevo zvake kuna Israeri.

²⁰Haana kumboita izvi kuno rumwe rudzi; havazivi mirayiro yake. Rumbidzai Jehovha.