Read Bhaibheri Dzvene MuChiShona Chanhasi Mapisarema 148 Bible Online

Mapisarema 148 - Bhaibheri Dzvene MuChiShona Chanhasi bible

Mapisarema 148

¹Rumbidzai Jehovha. Rumbidzai Jehovha kubva kumatenga, murumbidzei panzvimbo dzokumusoro-soro.

²Murumbidzei, imi vatumwa vake vose, murumbidzei, imi hondo dzake dzose dzokudenga.

³Murumbidzei, imi zuva nomwedzi, murumbidzei, imi nyeredzi dzose dzinopenya.

⁴Murumbidzei, imi matenga ari kumusoro-soro, nemi mvura zhinji iri pamusoro pamatenga.

⁵Ngazvirumbidze zita raJehovha, nokuti akarayira, izvo zvikasikwa.

⁶Akazviisa panzvimbo yazvo nokusingaperi-peri, akapa chirevo chisingazombopfuuri.

⁷Rumbidzai Jehovha imi nyika, imi zvisikwa zvikuru zvegungwa nokwakadzika kwenyanza,

⁸nemi mheni nechimvuramabwe, chando namakore, dutu remhepo rinoita zvaakareva,

⁹imi makomo nemi zvikomo zvose, miti inobereka nemisidhari yose,

¹⁰mhuka dzesango nemombe dzose, zvisikwa zvidiki neshiri dzinobhururuka,

¹¹Madzimambo enyika nendudzi dzose, imi machinda nemi vatongi vose panyika,

¹²majaya nemhandara, vatana navana.

¹³Ngavarumbidze zita raJehovha, nokuti zita rake iye oga iguru; kubwinya kwake kuri pamusoro penyika namatenga.

¹⁴Akasimudzira vanhu vake runyanga, iyo rumbidzo yavatsvene vake vose, yaIsraeri, vanhu vari pedyo nomwoyo wake. Rumbidzai Jehovha.