Read Bhaibheri Dzvene MuChiShona Chanhasi Mapisarema 16 Bible Online

Mapisarema 16 - Bhaibheri Dzvene MuChiShona Chanhasi bible

Mapisarema 16

¹Mikitami raDhavhidhi. Ndichengetedzei, imi Mwari, nokuti ndinovanda mamuri.

²Ndakati kuna Jehovha, “Ndimi Ishe wangu; kunze kwenyu handina chinhu chakanaka.”

³Kana vari vatsvene vari panyika, ndivo vakaisvonaka vandinofarira chose.

⁴Kuchema kuchawedzerwa, kwaavo vanomhanyira vamwe vamwari. Handichazodiri zvipiriso zvavo zveropa zvinodururwa kana kuisa mazita avo pamiromo yangu.

⁵Jehovha, makandigovera mugove wangu nomukombe wangu; mukaita kuti mugove wangu uchengetedzeke.

⁶Ndakayererwa miganhu panzvimbo yakanaka; zvirokwazvo ndine nhaka inofadza.

⁷Ndicharumbidza Jehovha, anondipa zano; kunyange usiku mwoyo wangu unondirayira.

⁸Ndakaisa Jehovha pamberi pangu nguva dzose. Nokuti ari kurudyi rwangu, handingatongozungunuswi.

⁹Naizvozvo mwoyo wangu unofara uye rurimi rwangu runopururudza; muviri wanguwo uchazorora zvakanaka,

¹⁰nokuti imi hamuzondisiyi muguva, kana kurega Mutsvene wenyu achiona kuora.

¹¹Makandizivisa nzira youpenyu; muchandizadza nomufaro uri pamberi penyu, nezvinofadza zvisingaperi muruoko rwenyu rworudyi.