Read Bhaibheri Dzvene MuChiShona Chanhasi Mapisarema 17 Bible Online

Mapisarema 17 - Bhaibheri Dzvene MuChiShona Chanhasi bible

Mapisarema 17

¹Munyengetero waDhavhidhi. Inzwai, imi Jehovha, mukumbiro wangu wakarurama; inzwai kuchema kwangu. Rerekerai nzeve yenyu kumunyengetero wangu, usingabvi pamiromo inonyengera.

²Kururamiswa kwangu ngakubve kwamuri; meso enyu ngaaone zvakarurama.

³Kunyange mukaedza mwoyo wangu uye mukandiongorora usiku, kunyange mukandiedza, hamungawani chinhu; ndakazvisunga kuti muromo wangu urege kutadza.

⁴Kana ari mabasa avanhu, neshoko remiromo yenyu, ndakanzvenga nzira dzouyo anoita nechisimba.

⁵Nhambwe dzangu dzakarambira panzira dzenyu; tsoka dzangu hadzina kutedzemuka.

⁶Haiwa Mwari, ndinodana kwamuri, nokuti muchandipindura; rerekerai nzeve yenyu kwandiri, munzwe munyengetero wangu.

⁷Ratidzai kushamisa kworudo rwenyu rukuru, imi munoponesa noruoko rwenyu rworudyi, avo vanovanda vavengi vavo mamuri.

⁸Ndichengetei semboni yeziso renyu; ndivanzei pasi pomumvuri wamapapiro enyu,

⁹kubva kuno wakaipa anondirwisa, kubva kuvavengi vangu, vanoda kundiuraya, vakandikomberedza.

¹⁰Vanodzivira mwoyo yavo yakavangarara, uye miromo yavo inotaura nokuzvikudza.

¹¹Vakandironda, zvino vandikomba, vanocherechedza nameso avo kuti vandiwisire pasi.

¹²Vakaita seshumba ine nzara yechokudya, seshumba huru yakavandira pakavanda.

¹³Haiwa, Jehovha, simukai, mirai pamberi pavo, vawisirei pasi; ndirwirei nomunondo wenyu pano wakaipa.

¹⁴Haiwa, Jehovha, ndiponesei noruoko rwenyu kubva kuvanhu vakadai, kubva kuvanhu venyika ino vano mubayiro uri muupenyu huno. Munopedza nzara yaavo vamunoda; vanakomana vavo vane zvakawanda, uye vanounganidzira vana vavo pfuma.

¹⁵Zvino ini mukururama, ndichaona chiso chenyu; pandinomuka, ndichagutswa nokuona mufananidzo wenyu.