Read Bhaibheri Dzvene MuChiShona Chanhasi Mapisarema 18 Bible Online

Mapisarema 18 - Bhaibheri Dzvene MuChiShona Chanhasi bible

Mapisarema 18

¹Kumutungamiri wokuimba. Pisarema raDhavhidhi muranda waJehovha. Akaimbira Jehovha mashoko orwiyo urwu paakarwirwa naJehovha kubva mumaoko avavengi vake vose nomuruoko rwaSauro. Akati: Ndinokudai, imi Jehovha, simba rangu.

²Jehovha ndiye dombo rangu, nhare yangu, murwiri wangu; Mwari wangu ndiye dombo rangu, wandinovanda maari. Ndiye nhoo yangu norunyanga rworuponeso rwangu, shongwe yangu.

³Ndinodana kuna Jehovha, iye akafanira kurumbidzwa, uye ndinoponeswa kubva kuvavengi vangu.

⁴Mabote orufu akandipinganidza; mvura zhinji inoparadza yakandifukidza.

⁵Mabote eguva akandimonera; misungo yorufu yakanangana neni.

⁶Pakutambudzika kwangu ndakadana kuna Jehovha; ndakadana kuna Mwari wangu kuti ndibatsirwe. Akanzwa inzwi rangu ari mutemberi yake; kuchema kwangu kwakasvika pamberi pake munzeve dzake.

⁷Nyika yakadedera ikadengenyeka, uye nheyo dzamakomo dzakazunguzika;

⁸Utsi hwakakwira huchibva mumhino dzake; moto unoparadza wakabuda mumuromo make, mazimbe anopisa akabuda mauri achipfuta.

⁹Akatsemura matenga akauya pasi; makore erima akanga ari pasi petsoka dzake.

¹⁰Akatasva makerubhi akabhururuka; akabhururuka pamapapiro emhepo.

¹¹Akaita rima chifukidzo chake, denga rake rakamupoteredza, iwo makore matema emvura okudenga.

¹²Nokupenya kwaibva pamberi pake, makore akabuda akafamba, nechimvuramabwe nokupenya kwemheni.

¹³Jehovha akatinhira kudenga; inzwi roWokumusoro-soro rikanzwika.

¹⁴Akapfura miseve yake akaparadzira vavengi vake, kupenya kukuru kwemheni kukavavhundutsa.

¹⁵Mipata yegungwa yakaiswa pachena, uye nheyo dzenyika dzakaiswa pachena pakutuka kwenyu, imi Jehovha, nokufema kwemhino dzenyu.

¹⁶Akadzika pasi achibva kumusoro akanditora; akandibudisa pamvura zhinji yakadzika.

¹⁷Akandinunura kubva kuvavengi vangu vane simba, kubva kuvadzivisi vangu, vakanga vakasimba zvikuru kwandiri.

¹⁸Vakandinanga pazuva renjodzi yangu, asi Jehovha akanga ari mutsigiri wangu.

¹⁹Akandibudisa akandiisa panzvimbo yakafarikana; akandinunura nokuti akanga achindifarira.

²⁰Jehovha akandiitira zvakafanira kururama kwangu; nokuchena kwamaoko angu.

²¹Nokuti ndakachengeta nzira dzaJehovha; handina kuita zvakaipa nokubva pana Mwari wangu.

²²Mirayiro yake yose iri pamberi pangu; handina kutsauka pazvirevo zvake.

²³Ndakanga ndisina chandingapomerwa pamberi pake, uye ndakazvichengeta kuti ndigare kure nechivi.

²⁴Jehovha akandipa mubayiro zvakaringana nokururama kwangu, zvakaringana nokuchena kwamaoko angu pamberi pake.

²⁵Kuna vakatendeka munoratidza kutendeka kwenyu, kuna vasina chavangapomerwa munoratidza kusapomerwa kwenyu,

²⁶kuna vakachena munoratidza kuchena kwenyu, asi kuna vakatsauka munoratidza hasha dzenyu.

²⁷Munoponesa vanozvininipisa, asi muchideredza vane meso anozvikudza.

²⁸Imi, iyemi Jehovha, munoita kuti mwenje wangu urambe uchipfuta; Mwari wangu anoshandura rima rangu richiva chiedza.

²⁹Norubatsiro rwenyu ndichaenda kundorwa hondo; naMwari wangu ndinogona kukwira rusvingo.

³⁰Kana ari Mwari, nzira yake yakakwana; shoko raJehovha harina charingapomerwa. Ndiye nhoo yavose vanovanda maari.

³¹Nokuti ndianiko Mwari kunze kwaJehovha? Uye ndianiko Dombo kunze kwaMwari wedu?

³²NdiMwari anondishongedza nesimba uye anokwanisa nzira yangu.

³³Anoita kuti tsoka dzangu dzive setsoka dzenondo; anoita kuti ndigone kumira pakakwirira.

³⁴Anodzidzisa maoko angu kurwa; maoko angu anowembura uta hwendarira.

³⁵Munondipa nhoo yenyu yokukunda, uye ruoko rwenyu rworudyi runonditsigira; munokotama pasi kuti mundiite mukuru.

³⁶Munondiitira nzira yakapamhama pasi pangu, kuitira kuti zvitsitsinho zvangu zvirege kutedzemuka.

³⁷Ndakatevera vavengi vangu ndikavabata; handina kudzokera shure kusvikira vaparadzwa.

³⁸Ndakavapwanya kuti vakoniwe kusimuka; vakawira pasi petsoka dzangu.

³⁹Makandishongedza nesimba rokurwa; makaita kuti vadzivisi vangu vapfugame patsoka dzangu.

⁴⁰Makaita kuti vavengi vangu vatize, uye ndakaparadza vavengi vangu.

⁴¹Vakachemera kubatsirwa, asi hakuna akavaponesa, kunyange kuna Jehovha, asi haana kuvapindura.

⁴²Ndakavapura vakatsetseka seguruva ratakurwa nemhepo; ndakavadururira pasi sedope renzira dzomumusha.

⁴³Makandirwira pakurwisa kwavanhu; makandiita musoro wendudzi; vanhu vandakanga ndisingazivi vava varanda vangu.

⁴⁴Pavanongondinzwa, vanonditeerera; vatorwa vanokotama pamberi pangu.

⁴⁵Vose vanoora mwoyo; vanouya vachibva panhare dzavo vachidedera.

⁴⁶Jehovha mupenyu! Dombo rangu ngarirumbidzwe! Ngaakudzwe Mwari Muponesi wangu!

⁴⁷Ndiye Mwari anonditsivira, anoisa ndudzi pasi pangu,

⁴⁸anondiponesa pavavengi vangu. Makandisimudzira pamusoro pavavengi vangu. Makandinunura kubva kuvanhu vechisimba.

⁴⁹Naizvozvo ndichakurumbidzai pakati pendudzi, imi Jehovha; ndichaimbira zita renyu nziyo dzokurumbidza.

⁵⁰Anopa mambo wake kukunda kukuru; anoratidza unyoro hwake husingaperi kumuzodziwa wake, kuna Dhavhidhi nokuvana vake nokusingaperi.