Read Bhaibheri Dzvene MuChiShona Chanhasi Mapisarema 22 Bible Online

Mapisarema 22 - Bhaibheri Dzvene MuChiShona Chanhasi bible

Mapisarema 22

¹Kumutungamiri wokuimba. Namaimbirwo e“Nondo yamangwanani.” Pisarema raDhavhidhi. Mwari wangu, Mwari wangu, mandisiyireiko? Sei muri kure zvakadai nokundiponesa, kure zvakadai namashoko okugomera kwangu?

²Haiwa Mwari wangu, ndinodanidzira masikati, asi hamundipinduri, nousiku, uye handinyarari.

³Asi imi makagadzwa saIye Mutsvene; ndimi rumbidzo yaIsraeri.

⁴Madzibaba edu akavimba nemi; vakavimba, uye mukavarwira.

⁵Vakachema kwamuri, vakaponeswa; vakavimba nemi uye havana kunyadziswa.

⁶Asi ini ndiri honye kwete munhu, ndinozvidzwa navanhu uye ndinoshorwa namarudzi.

⁷Vose vanondiona vanondiseka; vanoshamisa miromo yavo vachindituka, vachidzungudza misoro yavo vachiti,

⁸“Anovimba naJehovha; Jehovha ngaamununure. Ngaamuponese, sezvo achimufarira.”

⁹Asi ndimi makandibudisa mudumbu; mukaita kuti ndivimbe nemi ndichiri pachipfuva chamai vangu.

¹⁰Kubva pakuzvarwa kwangu, ndakaiswa kwamuri; kubva mudumbu ramai vangu, makanga muchingova Mwari wangu.

¹¹Regai kuva kure neni, nokuti dambudziko riri pedyo uye hakuna angabatsira.

¹²Hando zhinji dzakandikomba; hando dzine simba dzeBhashani dzakandipoteredza.

¹³Shumba dzinoomba dzichibvambura nyama, dzinondishamira miromo yadzo.

¹⁴Ndadururwa semvura, uye mapfupa angu ose abva asvodogoka. Mwoyo wangu washanduka ukava namo; wanyungudika mukati mangu.

¹⁵Simba rangu raoma sechaenga, uye rurimi rwangu runonamatira kumusoro kwomuromo wangu; munondiradzika muguruva rorufu.

¹⁶Imbwa dzakandikomba; boka ravanhu vakaipa rakandipoteredza, vakabvoora maoko angu netsoka dzangu.

¹⁷Ndinokwanisa kuverenga mapfupa angu ose; vanhu vanondinanʼanidza uye vanofarira kutambudzika kwangu.

¹⁸Vanogovana nguo dzangu pakati pavo uye vanokanda mijenya nokuda kwenguo yangu.

¹⁹Asi imi, Jehovha, regai kuva kure neni; imi simba rangu, kurumidzai kundibatsira.

²⁰Rwirai upenyu hwangu pamunondo, ihwo upenyu hwangu hunokosha, kubva pasimba rembwa.

²¹Ndinunurei pamuromo weshumba; ndiponesei panyanga dzenyati.

²²Ndichaparidza zita renyu kuhama dzangu; ndichakurumbidzai paungano.

²³Imi munotya Jehovha, murumbidzei! Imi mose zvizvarwa zvaJakobho, mukudzei! Mutyei, imi mose zvizvarwa zvaIsraeri!

²⁴Nokuti haana kuzvidza kana kusema chibayiro chaiye akatambudzwa; haana kumuvanzira chiso chake, asi akanzwa kuchemera kwake rubatsiro.

²⁵Kwamuri ndiko kunobva dingindira rerumbidzo yangu paungano huru; ndichazadzisa mhiko dzangu pamberi pavanokutyai.

²⁶Varombo vachadya uye vagoguta; vanotsvaka Jehovha vachamurumbidza, mwoyo yenyu ngairarame nokusingaperi!

²⁷Migumo yose yenyika icharangarira igodzokera kuna Jehovha, uye mhuri dzendudzi dzose dzichapfugama pamberi pake,

²⁸nokuti ushe ndohwaJehovha uye anotonga pamusoro pendudzi.

²⁹Vapfumi vose venyika vachadya uye vachamunamata; vose vanoburukira muguruva vachapfugama pamberi pake, navose vasingagoni kuzviraramisa.

³⁰Vana vake vachamushumira; zvizvarwa zvinotevera zvichaudzwa nezvaIshe.

³¹Vachaparidza kururama kwake kuvanhu vasati vaberekwa, nokuti akazviita.