Read Bhaibheri Dzvene MuChiShona Chanhasi Mapisarema 25 Bible Online

Mapisarema 25 - Bhaibheri Dzvene MuChiShona Chanhasi bible

Mapisarema 25

¹Pisarema raDhavhidhi. Jehovha, ndinosimudzira mwoyo wangu kwamuri;

²haiwa Mwari wangu, ndinovimba nemi. Musandirega ndichinyadziswa, uye musarega vavengi vangu vachindikunda.

³Hapana munhu ane tariro mamuri achanyadziswa, asi vachanyadziswa avo vanonyengera pasina chikonzero.

⁴Ndiratidzei nzira dzenyu, imi Jehovha, ndidzidzisei nzira dzenyu;

⁵nditungamirirei muzvokwadi yenyu mugondidzidzisa, nokuti ndimi Mwari Muponesi wangu, uye tariro yangu iri pamuri zuva rose.

⁶Rangarirai, imi Jehovha, ngoni dzenyu huru norudo, nokuti zvakabvira kare.

⁷Regai kurangarira zvivi zvouduku hwangu, nenzira dzangu dzandaikumukirai nadzo; ndirangarirei nokuda kworudo rwenyu, nokuti makanaka, imi Jehovha.

⁸Jehovha akanaka uye akarurama; naizvozvo anodzidzisa vatadzi nzira dzake.

⁹Anotungamirira vanozvininipisa mune zvakarurama, uye anovadzidzisa nzira yake.

¹⁰Nzira dzose dzaJehovha ndedzorudo nokutendeka, kuna avo vanochengeta zvirevo zvesungano yake.

¹¹Nokuda kwezita renyu, imi Jehovha, kanganwirai chakaipa changu, kunyange chiri chikuru.

¹²Ndiani, zvino, munhu anotya Jehovha? Achamudzidzisa nzira yaakasarudzirwa.

¹³Achararama upenyu hwake mukubudirira, uye zvizvarwa zvake zvichagara nhaka yenyika.

¹⁴Jehovha anogara pakati pavanomutya; anozivisa sungano yake kwavari.

¹⁵Meso angu anoramba achitarira kuna Jehovha, nokuti ndiye chete anosunungura tsoka dzangu pamusungo.

¹⁶Dzokerai kwandiri uye mundinzwire nyasha, nokuti ndiri ndoga uye ndinotambudzika.

¹⁷Matambudziko omwoyo wangu awanda; ndisunungurei pakurwadziwa kwangu.

¹⁸Tarirai kutambudzika kwangu nenhamo yangu, mugobvisa zvivi zvangu zvose.

¹⁹Tarirai kuwanda kwaita vavengi vangu, uye kuti vanondivenga zvakakura sei!

²⁰Rindai upenyu hwangu mugondinunura; ndirege kunyadziswa, nokuti ndinovanda mamuri.

²¹Kusanyengera nokururama ngazvindichengete, nokuti tariro yangu iri mamuri.

²²Dzikinurai Israeri, imi Mwari, kuti vabve mumatambudziko avo ose!