Read Bhaibheri Dzvene MuChiShona Chanhasi Mapisarema 29 Bible Online

Mapisarema 29 - Bhaibheri Dzvene MuChiShona Chanhasi bible

Mapisarema 29

¹Pisarema raDhavhidhi. Ipai kuna Jehovha, imi mune simba ipai kuna Jehovha rukudzo nesimba.

²Ipai kuna Jehovha rukudzo rwakafanira zita rake; namatai Jehovha mukubwinya kwoutsvene hwake.

³Inzwi raJehovha riri pamusoro pemvura zhinji. Mwari wokubwinya anotinhira, Jehovha anotinhira ari pamusoro pemvura zhinji.

⁴Inzwi raJehovha rine simba; inzwi raJehovha rinokudzwa.

⁵Inzwi raJehovha rinovhuna misidhari, Jehovha anovhuna-vhuna misidhari yeRebhanoni.

⁶Anoita kuti Rebhanoni ikwakuke semhuru, neSirioni senzombe yenyati.

⁷Inzwi raJehovha rinorova nokuvaima kwemheni.

⁸Inzwi raJehovha rinozungunusa gwenga; Jehovha anozungunusa Gwenga reKadheshi.

⁹Inzwi raJehovha rinomonyorora miouki uye rinosvuura sango rigosara rati hwe-e. Uye mutemberi yake zvose zvinodana zvichiti, “Kubwinya!”

¹⁰Jehovha anogara pachigaro choushe chamafashamu emvura; Jehovha anogara ari Mambo nokusingaperi.

¹¹Jehovha anopa simba kuvanhu vake; Jehovha anoropafadza vanhu vake norugare.