Read Bhaibheri Dzvene MuChiShona Chanhasi Mapisarema 33 Bible Online

Mapisarema 33 - Bhaibheri Dzvene MuChiShona Chanhasi bible

Mapisarema 33

¹Imbirai Jehovha, mufarisise, imi vakarurama; zvakanaka kuti vakarurama vamurumbidze.

²Rumbidzai Jehovha nembira; muimbirei nziyo nomutengeranwa une hungiso gumi.

³Muimbirei rwiyo rutsva; muridze zvakanaka, mugopururudza nomufaro.

⁴Nokuti shoko raJehovha rakarurama uye nderechokwadi; iye akatendeka pane zvose zvaanoita.

⁵Jehovha anoda kururama nokururamisira; nyika izere norudo rwake rusingaperi.

⁶Kudenga denga kwakaitwa neshoko raJehovha, hondo dzenyeredzi dzaikoko, nokufema kwomuromo wake.

⁷Anounganidza mvura zhinji yegungwa muzvirongo; anoisa kwakadzika mumatura.

⁸Nyika yose ngaitye Jehovha; marudzi ose enyika ngaamuremekedze.

⁹Nokuti iye akataura, zvikaitika; akarayira, zvikamira zvakasimba.

¹⁰Jehovha anokonesa urongwa hwendudzi; anopinganidza mifungo yendudzi.

¹¹Asi urongwa hwaJehovha hunomira hwakasimba nokusingaperi, nendangariro dzomwoyo wake kusvikira kuzvizvarwa zvose.

¹²Rwakaropafadzwa rudzi rwakaita Jehovha Mwari warwo, vanhu vaakasarudza kuti vave nhaka yake.

¹³Jehovha anotarira pasi ari kudenga uye anoona marudzi ose avanhu;

¹⁴ari pachigaro chake anotarira vose vagere panyika,

¹⁵iye anoumba mwoyo yavanhu vose, anofungisisa zvose zvavanoita.

¹⁶Hapana mambo anoponeswa nokukura kwehondo yake; hapana murwi anopunyuka nokuda kwesimba rake guru.

¹⁷Bhiza itariro isina maturo pakurwirwa; harigoni kuponesa kunyange rine simba guru.

¹⁸Asi meso aJehovha ari pamusoro paavo vanomutya, napamusoro paavo vakaisa tariro yavo murudo rwake rusingaperi,

¹⁹kuti avarwire parufu nokuvararamisa panzara.

²⁰Tinomirira Jehovha netariro; ndiye mubatsiri wedu nenhoo yedu.

²¹Mwoyo yedu inofara maari, nokuti tinovimba nezita rake dzvene.

²²Rudo rwenyu rusingaperi ngarugare pamusoro pedu, imi Jehovha, kunyange sezvatakaisa tariro yedu mamuri.