Read Bhaibheri Dzvene MuChiShona Chanhasi Mapisarema 34 Bible Online

Mapisarema 34 - Bhaibheri Dzvene MuChiShona Chanhasi bible

Mapisarema 34

¹Pisarema raDhavhidhi. Paakaita seanopenga pamberi paAbhimereki; uyo akamudzinga, iye akaenda hake. Ndinorumbidza Jehovha nguva dzose; kurumbidzwa kwake kucharamba kuri pamiromo yangu.

²Mwoyo wangu uchazvirumbidza muna Jehovha; vanotambudzika ngavanzwe vafare.

³Kudzai Jehovha pamwe chete neni; ngatikudzei zita rake pamwe chete.

⁴Ndakachema kuna Jehovha akandipindura; akandisunungura pakutya kwangu kwose.

⁵Vanotarira kwaari vanopenya; zviso zvavo hazvingambofukidzwi nenyadzi.

⁶Murombo uyu akadana, uye Jehovha akamunzwa; akamuponesa pakutambudzika kwake kwose.

⁷Mutumwa waJehovha anokomberedza avo vanomutya, uye anovasunungura.

⁸Ravirai henyu muone kuti Jehovha akanaka; akaropafadzwa munhu anovanda maari.

⁹Ityai Jehovha, imi vatsvene vake, nokuti vanomutya havana chavanoshayiwa.

¹⁰Shumba dzinopera simba uye dzinofa nenzara, asi avo vanotsvaka Jehovha havashayiwi chinhu chakanaka.

¹¹Uyai, vana vangu, nditeererei; ndichakudzidzisai kutya Jehovha.

¹²Ani naani wenyu anoda upenyu, uye uchida kuona mazuva akawanda,

¹³dzora rurimi rwako pane zvakaipa nemiromo yako pakureva nhema.

¹⁴Ibva pane zvakaipa ugoita zvakanaka; tsvaka rugare uye urutevere.

¹⁵Meso aJehovha ari pamusoro pavakarurama uye nzeve dzake dzinonzwa kuchema kwavo;

¹⁶chiso chaJehovha chinovenga avo vanoita zvakaipa, kuti abvise chiyeuchidzo chavo panyika.

¹⁷Vakarurama vanodanidzira, uye Jehovha anovanzwa; anovarwira pakutambudzika kwavo kwose.

¹⁸Jehovha ari pedyo navane mwoyo yakaputsika uye anoponesa avo vakapwanyika pamweya.

¹⁹Akarurama angava namatambudziko mazhinji, asi Jehovha anomurwira paari ose;

²⁰anochengetedza mapfupa ake ose, hakuna nerimwe rawo richavhunika.

²¹Zvakaipa zvichauraya vakaipa; vavengi vavakarurama vachapiwa mhosva.

²²Jehovha anodzikinura varanda vake; hapana kana mumwe anovanda maari achapiwa mhosva.