Read Bhaibheri Dzvene MuChiShona Chanhasi Mapisarema 37 Bible Online

Mapisarema 37 - Bhaibheri Dzvene MuChiShona Chanhasi bible

Mapisarema 37

¹Pisarema raDhavhidhi. Usava neshungu nokuda kwavanhu vakaipa, uye usaitira godo avo vanoita zvakaipa;

²nokuti souswa vachaoma nokukurumidza, somuriwo wakasvibira vachakurumidza kuoma.

³Vimba naJehovha uite zvakanaka; gara panyika ufarikane pamafuro manyoro.

⁴Farikana muna Jehovha, uye iye achakupa zvinodikanwa nomwoyo wako.

⁵Isa nzira yako kuna Jehovha; uvimbe naye uye iye achaita izvi;

⁶achaita kuti kururama kwako kupenye samambakwedza, nokururamisirwa kwako sezuva ramasikati.

⁷Nyarara pamberi paJehovha, umurindire unyerere; usava neshungu kana vanhu vachibudirira panzira dzavo, pavanoita mano avo akaipa avakaronga.

⁸Rega kutsamwa, uzvidzore pahasha; usava neshungu zvinokutungamirira mune zvakaipa.

⁹Nokuti vasakarurama vachagurwa, asi avo vanomirira Jehovha vachagara nhaka yenyika.

¹⁰Chinguva chiduku duku, vakaipa havachazovapozve; kunyange ukavatsvaka, havazowanikwi.

¹¹Asi vanyoro vachagara nhaka yenyika, uye vachafarikana norugare rukuru.

¹²Vakaipa vanofungira vakarurama mano akaipa, uye vanovarumanyira meno avo.

¹³Asi Ishe anoseka vakaipa nokuti anoziva kuti zuva ravo riri kuuya.

¹⁴Vakaipa vanovhomora munondo uye vanowembura uta kuti vawisire pasi varombo navanoshayiwa, kuti vauraye avo vane nzira dzakarurama.

¹⁵Asi minondo yavo ichabaya mwoyo yavo pachavo, uye uta hwavo huchavhunika.

¹⁶Zvishoma zvowakarurama zviri nani kupinda pfuma yavakaipa vazhinji;

¹⁷nokuti simba ravakaipa richavhuniwa, asi Jehovha anotsigira vakarurama.

¹⁸Mazuva avakarurama anozivikanwa naJehovha, uye nhaka yavo ichagara nokusingaperi.

¹⁹Panguva yamatambudziko, havanganyadziswi; mumazuva enzara ivo vachava nezvakawanda.

²⁰Asi vakaipa vachaparara: vavengi vaJehovha vachafanana norunako rweminda, vachanyangarika soutsi.

²¹Vakaipa vanokwereta uye havadzori, asi vakarurama vanopa zvakawanda;

²²avo vanoropafadzwa naJehovha vachagara nhaka yenyika, asi avo vaanotuka vachaparadzwa.

²³Kana Jehovha achifarira nzira yomunhu, anosimbisa mafambiro ake;

²⁴kunyange akagumburwa, haangawi, nokuti Jehovha anomutsigira noruoko rwake.

²⁵Ndakanga ndiri muduku uye zvino ndakwegura, asi handina kumboona vakarurama vachiraswa, kana vana vavo vachipemha chingwa.

²⁶Vanogara vachingopa vamwe, uye vachikweretesa pasina muripo; vana vavo vacharopafadzwa.

²⁷Dzoka pane zvakaipa ugoita zvakanaka; ipapo uchagara panyika nokusingaperi.

²⁸Nokuti Jehovha anoda vanoruramisira uye haangazosiyi vanhu vake vakatendeka. Vachadzivirirwa nokusingaperi; asi vana vowakaipa vachaparadzwa;

²⁹vakarurama vachagara nhaka yenyika uye vachagara mairi nokusingaperi.

³⁰Muromo womunhu akarurama unotaura uchenjeri, uye rurimi rwake runotaura kururamisira.

³¹Murayiro waMwari wake uri pamwoyo wake; tsoka dzake hadzitedzemuki.

³²Vakaipa vanovandira vakarurama, vachitsvaka upenyu hwavo chaihwo;

³³asi Jehovha haangavasiyi vari musimba ravo, kana kuvarega vachipomerwa kana vamira pakutongwa.

³⁴Rindira Jehovha, uye uchengete nzira yake. Achakusimudzira kuti ugare nhaka yenyika; kana vakaipa voparadzwa, iwe uchazviona.

³⁵Ndakaona munhu akaipa uye ano utsinye achibudirira somuti wakasvibira pavhu romunyika yawo,

³⁶asi nokukurumidza akapfuura uye akasazovapozve; kunyange ndakamutsvaka, haana kuzowanikwa.

³⁷Cherechedza asina mhosva, ongorora akarurama; ane ramangwana rakanaka munhu worugare.

³⁸Asi vatadzi vose vachaparadzwa; ramangwana rowakaipa richagurwa.

³⁹Ruponeso rwavakarurama runobva kuna Jehovha; ndiye nhare yavo panguva yamatambudziko.

⁴⁰Jehovha anovabatsira uye anovanunura; anovanunura kubva kuna vakaipa uye anovaponesa, nokuti vanovanda maari.