Read Bhaibheri Dzvene MuChiShona Chanhasi Mapisarema 39 Bible Online

Mapisarema 39 - Bhaibheri Dzvene MuChiShona Chanhasi bible

Mapisarema 39

¹Kumutungamiri wokuimba. Kuna Jedhutuni. Pisarema raDhavhidhi. Ndakati, “Ndichangwarira nzira dzangu nokuchengeta rurimi rwangu pachivi; ndichaisa matomu pamuromo wangu kana vakaipa vari pamberi pangu.”

²Asi pandakanga ndinyerere uye ndakadzikama, ndisingatauri kana chakanaka zvacho, kurwadziwa kwangu kwakawedzerwa.

³Mwoyo wangu wakapisa mukati mangu, uye pandakafungisisa, moto ukapisa; ipapo ndakataura norurimi rwangu ndikati:

⁴“Ndiratidzei, imi Jehovha, magumo oupenyu hwangu nokuwanda kwamazuva angu; ndizivisei kupfuura kwoupenyu hwangu.

⁵Makaita mazuva angu soupamhi hwechanza changu; kuwanda kwamakore angu kwakaita sechinhu chisipo pamberi penyu. Upenyu hwomunhu mumwe nomumwe mweya bedzi.

⁶Munhu anongori mumvuri zvaanofamba-famba hake: anofamba nomufaro mukuru, asi zvinongova pasina; anounganidza pfuma, asingazivi achazoitora.

⁷“Asi zvino, Ishe, ndakamirireiko? Tariro yangu iri mamuri.

⁸Ndiponesei pakudarika kwangu kwose; regai kundiita chiseko chamapenzi.

⁹Ndakanga ndinyerere; handina kushamisa muromo wangu, nokuti ndimi makaita izvi.

¹⁰Bvisai shamhu yenyu kwandiri; ndakundwa nokurova kworuoko rwenyu.

¹¹Munorayira uye munoranga vanhu nokuda kwezvivi zvavo, munoparadza pfuma yavo sechipfukuto, munhu mumwe nomumwe mweya zvawo. Sera

¹²“Inzwai munyengetero wangu, imi Jehovha, rerekerai nzeve yenyu pandinochemera rubatsiro; regai kuva matsi pakuchema kwangu. Nokuti ndigere nemi somutorwa, somweni, sezvakanga zvakaita madzibaba angu ose.

¹³Ringirai kure neni, kuti ndimbofarazve ndisati ndabva uye ndisisipo.”