Read Bhaibheri Dzvene MuChiShona Chanhasi Mapisarema 41 Bible Online

Mapisarema 41 - Bhaibheri Dzvene MuChiShona Chanhasi bible

Mapisarema 41

¹Kumutungamiri wokuimba. Pisarema raDhavhidhi. Akaropafadzwa uyo ane hanya navasina simba; Jehovha anomurwira panguva dzokutambudzika.

²Jehovha achamudzivirira uye achachengetedza upenyu hwake; achamuropafadza panyika uye haangamuisi kuchido chavavengi vake.

³Jehovha achamuraramisa panhoo yake yourwere uye achamuponesa panhoo yake yourwere.

⁴Ini ndakati, “Haiwa Jehovha, ndinzwirei ngoni; ndiporesei, nokuti ndakakutadzirai.”

⁵Vavengi vangu vachindigodora vanoti, “Achafa riniko uye zita rake rigoparara?”

⁶Kana mumwe achiuya kuzondiona, anotaura zvenhema, mwoyo uchiunganidza makuhwa; ipapo anobuda ondozviparadzira kumwe.

⁷Vavengi vangu vose vanoita zevezeve pamwe chete pamusoro pangu; vanondifungira zvakaipisisa, vachiti,

⁸“Chirwere chakaipa chakamubata, haachambomukizve panzvimbo paakarara.”

⁹Kunyange neshamwari yangu yapedyo yandaivimba nayo, yandaigovana zvokudya nayo, yandisimudzira chitsitsinho chayo.

¹⁰Asi imi, iyemi Jehovha, mune tsitsi neni, ndisimudzei, kuti ndivatsive.

¹¹Ndinoziva kuti munofadzwa neni, nokuti muvengi wangu haandikundi.

¹²Munonditsigira pakutendeka kwangu, uye munondiisa pamberi penyu nokusingaperi.

¹³Kurumbidzwa ngakuve kuna Jehovha, Mwari waIsraeri, kubva pakusingaperi kusvikira nokusingaperi. Ameni naAmeni.