Read Bhaibheri Dzvene MuChiShona Chanhasi Mapisarema 44 Bible Online

Mapisarema 44 - Bhaibheri Dzvene MuChiShona Chanhasi bible

Mapisarema 44

¹Kumutungamiri wokuimba waVanakomana vaKora. Masikiri. Haiwa Mwari, takanzwa nenzeve dzedu; madzibaba edu akatiudza zvamakaita pamazuva avo, pamazuva ekare.

²Noruoko rwenyu makadzinga ndudzi uye mukasima madzibaba edu; makapwanya marudzi mukaita kuti madzibaba edu abudirire.

³Havana kuzviwanira nyika nomunondo wavo, uye ruoko rwavo haruna kuvakundisa; rwakanga rwuri ruoko rwenyu rworudyi, irwo ruoko rwenyu, nokupenya kwechiso chenyu, nokuti imi makavada.

⁴Ndimi Mambo wangu naMwari wangu, anorayira kukunda kwaJakobho.

⁵Kubudikidza nemi, tinosunda vavengi vedu shure; kubudikidza nezita renyu, tinotsika vavengi vedu netsoka dzedu.

⁶Handivimbi nouta hwangu, munondo wangu haundivigiri kukunda;

⁷asi imi munotipa kukunda pamusoro pavavengi vedu, munonyadzisa vadzivisi vedu.

⁸Tinozvirumbidza muna Mwari zuva rose, uye ticharumbidza zita renyu nokusingaperi. Sera

⁹Asi zvino matiramba uye matininipisa; hamuchabudi nehondo dzedu.

¹⁰Makaita kuti tidududze pamberi pavavengi vedu, uye vadzivisi vedu vakatipamba.

¹¹Makatiramwira kumudyi samakwai uye makatiparadzira pakati pendudzi.

¹²Makatengesa vanhu venyu pasina, hamuna kuwana kana chinhu pakuvatengesa.

¹³Makatiita chiseko kuvavakidzani vedu, chinozvidzwa nechinosekwa chaavo vakatipoteredza.

¹⁴Makatiita tsumo pakati pendudzi; vanhu vanotidzungudzira misoro.

¹⁵Kunyadziswa kwangu kuri pamberi pangu zuva rose, uye chiso changu chafukidzwa nenyadzi

¹⁶pakuseka kwaavo vanondizvidza nokundirwisa, nokuda kwomuvengi, agarira kutsiva.

¹⁷Zvose izvi zvakaitika kwatiri kunyange takanga tisina kukukanganwai, kana kuva vasina kutendeka kusungano yenyu.

¹⁸Mwoyo yedu yakanga isati yafuratira; tsoka dzedu dzakanga dzisati dzatsauka panzira yenyu.

¹⁹Asi makatipwanya mukatiita nzvimbo yamakava uye mukatifukidza nerima guru.

²⁰Dai takanga takanganwa zita raMwari wedu, kana kutambanudzira maoko edu kuna mwari wavatorwa,

²¹Mwari haaizviziva here, sezvo achiziva zvakavanzika zvomwoyo?

²²Asi nokuda kwenyu takatarisana norufu zuva rose; tinotorwa samakwai anobayiwa.

²³Mukai, imi Ishe! Munovatireiko? Zvisimudzei! Regai kutiramba nokusingaperi.

²⁴Ko, munovanzirei chiso chenyu muchikanganwa kutambudzika nokudzvinyirirwa kwedu?

²⁵Takawisirwa muguruva; miviri yedu inonamatira pavhu.

²⁶Simukai mutibatsire; tidzikinurei nokuda kworudo rwenyu rusingaperi.