Read Bhaibheri Dzvene MuChiShona Chanhasi Mapisarema 48 Bible Online

Mapisarema 48 - Bhaibheri Dzvene MuChiShona Chanhasi bible

Mapisarema 48

¹Rwiyo. Pisarema raVanakomana vaKora. Jehovha mukuru, uye anofanira kurumbidzwa kwazvo, muguta raMwari wedu, mugomo rake dzvene.

²Rakanaka pakukwirira kwaro, mufaro wenyika yose. Sokumusoro-soro kweZafoni, ndizvo zvakaita Gomo reZioni, guta raMambo Mukuru.

³Mwari ari munhare dzaro; akazviratidza kwariri kuti ndiye nharirire yaro.

⁴Madzimambo akati abatanidza mauto, vakati vafamba pamwe chete kundorwa,

⁵vakariona vakashamiswa; vakatiza nokutya.

⁶Vakabatwa nokudedera ipapo, nokurwadziwa sekwomukadzi osununguka.

⁷Makavaparadza sezvakaitwa zvikepe zveTashishi, zvakaputswa-putswa nemhepo yokumabvazuva.

⁸Sezvatakanzwa, ndizvo zvataona, muguta raJehovha Wamasimba Ose, muguta raMwari wedu: Mwari anorisimbisa nokusingaperi. Sera

⁹Tiri mukati metemberi yenyu, imi Mwari, tinofungisisa nezvorudo rwenyu rusingaperi.

¹⁰Sezvakaita zita renyu, imi Mwari, kurumbidzwa kwenyu kunosvika kumagumo enyika; ruoko rwenyu rworudyi ruzere nokururama.

¹¹Gomo reZioni rinofarisisa, misha yeJudha inofara nokuda kwokutonga kwenyu.

¹²Famba-fambai muZioni, ripoteredzei, verengai shongwe dzaro,

¹³fungisisai zvakanaka nezvamasvingo aro, cherechedzai nhare dzaro, kuti mugotaura nezvazvo kuchizvarwa chinotevera.

¹⁴Nokuti Mwari uyu ndiye Mwari wedu nokusingaperi-peri; iye achava muperekedzi wedu kusvikira kumagumo.