Read Bhaibheri Dzvene MuChiShona Chanhasi Mapisarema 49 Bible Online

Mapisarema 49 - Bhaibheri Dzvene MuChiShona Chanhasi bible

Mapisarema 49

¹Kumutungamiri wokuimba, waVanakomana vaKora. Pisarema. Inzwai izvi, imi vanhu mose; teererai imi mose mugere panyika,

²vapasi navapamusoro, vapfumi navarombo pamwe chete.

³Muromo wangu uchataura nouchenjeri; kutaura kunobva pamwoyo wangu kuchapa kunzwisisa.

⁴Ndicharerekera nzeve yangu kuchirahwe; nembira ndichadudzira shoko rangu rakavanzika.

⁵Ndinotyireiko kana mazuva akaipa achiuya, kana vanyengeri vakaipa vandikomberedza,

⁶vaya vanovimba nepfuma yavo vanozvikudza nepfuma yavo zhinji?

⁷Hakuna munhu angadzikinura upenyu hwomumwe kana kupa Mwari rudzikinuro rwake,

⁸rudzikinuro rwoupenyu runokosha, hakuna muripo unoringana nahwo,

⁹kuti ararame nokusingaperi uye kuti asaona kuora.

¹⁰Nokuti vose vanogona kuona kuti vanhu vakachenjera vanofa; mapenzi navasina pfungwa zvimwe chetezvo vanofa, uye vanosiyira vamwe pfuma yavo.

¹¹Marinda avo achagara ari dzimba dzavo nokusingaperi, nougaro hwavo kusvikira kuzvizvarwa zvisingaperi, kunyange vakanga vakapa nyika mazita avo.

¹²Asi munhu, kunyange ane pfuma yake, haagari; akafanana nemhuka dzinofa.

¹³Ndiwo magumo aivavo vanovimba nezvavanoita, namagumo avateveri vavo, vanotenda zvavanotaura. Sera

¹⁴Samakwai vakatarirwa kuenda kuguva, uye rufu ruchavadya. Vakarurama vachavatonga mangwanani; chimiro chavo chichaora murinda, kure nedzimba dzavo dzoumambo.

¹⁵Asi Mwari achadzikinura upenyu hwangu kubva muguva, zvirokwazvo achanditora iye. Sera

¹⁶Usanyanya kutya kana munhu apfuma, kana kubwinya kweimba yake kwawedzerwa;

¹⁷nokuti haana chaachatora paanofa; kubwinya kwake hakungaburukiri naye murinda.

¹⁸Kunyange paairarama aizviti akaropafadzwa, uye vanhu vachirumbidza munhu paanobudirira,

¹⁹achabatana norudzi rwamadzibaba ake, vasingazoonizve chiedza choupenyu.

²⁰Munhu ane pfuma zhinji asinganzwisisi akaita semhuka dzinofa.