Read Bhaibheri Dzvene MuChiShona Chanhasi Mapisarema 50 Bible Online

Mapisarema 50 - Bhaibheri Dzvene MuChiShona Chanhasi bible

Mapisarema 50

¹Pisarema raAsafi. Iye Wamasimba, Mwari, Jehovha, anotaura uye anodana nyika kubva pakubuda kwezuva kusvikira kwarinovirira.

²Kubva kuZioni, rakakwana parunako, Mwari anopenya.

³Mwari wedu anouya uye haanganyarari; moto unoparadza pamberi pake, uye dutu rine hasha rakamupoteredza.

⁴Anodana matenga kumusoro, uye nenyika, kuti atonge vanhu vake achiti:

⁵“Ndiunganidzirei vatsvene vangu, vakaita sungano neni nechibayiro.”

⁶Uye matenga anoparidza kururama kwake, nokuti Mwari amene ndiye mutongi. Sera

⁷“Inzwai, imi vanhu vangu, uye ndichataura, imi Israeri, uye ndichapupura pamusoro penyu: Ndini Mwari, Mwari wenyu.

⁸Handikutukei nokuda kwezvibayiro zvenyu, kana zvipiriso zvenyu zvinopiswa, zvinogara zviri pamberi pangu.

⁹Handisi kuda hando inobva mudanga rako, kana mbudzi inobva muzvirugu zvako,

¹⁰nokuti mhuka dzose dzesango ndedzangu, nemombe pamakomo chiuru.

¹¹Ndinoziva shiri dzose dziri mumakomo, uye zvisikwa zvose zvesango ndezvangu.

¹²Kana dai ndaiva nenzara, handaikuudza iwe, nokuti nyika ndeyangu, nezvose zviri mairi.

¹³Ko, ndinodya nyama yehando kana kunwa ropa rembudzi here?

¹⁴“Bayirai zvibayiro zvokuvonga kuna Mwari, zadzisai zvamakapikira Wokumusoro-soro,

¹⁵uye mudane kwandiri pazuva rokutambudzika; ndichakurwirai, uye imi muchandikudza.”

¹⁶Asi kuna vakaipa, Mwari anoti: “Ko, une mvumo ipiko iwe yokuti ududzire mutemo wangu, kana kuisa sungano yangu pamiromo yako?

¹⁷Unovenga kurayira kwangu, uye unorasira mashoko angu shure kwako.

¹⁸Paunoona mbavha, unowadzana nayo; unogoverana nemhombwe mugove wako.

¹⁹Unoshandisa muromo wako kuita zvakaipa, uye unorovedza rurimi rwako kukunyengera.

²⁰Unogara uchipomera hama yako uye unoitira mwanakomana wamai vako makuhwa.

²¹Zvinhu izvi wakazviita ini ndikaramba ndinyerere; wakafunga kuti ndakafanana newe. Asi ndichakutsiura uye ndichaisa mhosva iyi pamberi pako.

²²“Fungai izvi, imi vanokanganwa Mwari, kuti ndirege kukubvambura-bvamburai mukashaya angakununurai:

²³Munhu anobayira chibayiro chokuvonga ndiye anondikudza, uye anogadzira nzira kuitira kuti ndimuratidze ruponeso rwaMwari.”