Read Bhaibheri Dzvene MuChiShona Chanhasi Mapisarema 55 Bible Online

Mapisarema 55 - Bhaibheri Dzvene MuChiShona Chanhasi bible

Mapisarema 55

¹Kumutungamiri wokuimba nemitengeranwa ine hungiso. Rwiyo rweMasikiri rwaDhavhidhi. Rerekerai nzeve yenyu kumunyengetero wangu, imi Mwari; regai kushaya hanya nokukumbira kwangu;

²ndinzwei, uye ndipindureiwo. Pfungwa dzangu dzinondinetsa uye ndiri kushushikana,

³pandinonzwa inzwi romuvengi wangu, pandinodzvokorwa navakaipa; nokuti vanodururira matambudziko pamusoro pangu, uye vanondituka mukutsamwa kwavo.

⁴Mwoyo wangu unorwadziwa mukati mangu; kutyisa kworufu kunondiwira.

⁵Kutya nokudedera zvakandibata; kutya kukuru kwakandifukidza.

⁶Ini ndakati, “Haiwa, dai ndina mapapiro enjiva! Ndaibhururukira kure ndikandozorora hangu,

⁷ndaitizira kure kwazvo, ndikandogara mugwenga; Sera

⁸ndaikurumidza kundovanda panzvimbo yangu, kure nemafungu nedutu.”

⁹Nyonganisai vakaipa, imi Ishe, kanganisai mutauro wavo, nokuti ndinoona mhirizhonga nokurwa muguta.

¹⁰Masikati nousiku vanopoterera masvingo aro chinyararire; utsinye nokumanikidza zviri mukati maro.

¹¹Masimba okuparadza azere muguta; kutyisidzira nenhema hazvibvi munzira dzaro.

¹²Dai ndatukwa nomuvengi, ndaigona kushinga hangu; dai muvengi aindimukira, ndaigona kumuvanda hangu.

¹³Asi ndiwe, munhu akaita seni, mumwe wangu, shamwari yangu yapedyo,

¹⁴yandaimbofarira kuwadzana nayo pataifamba navazhinji mumba maMwari.

¹⁵Rufu ngaruwane vavengi vangu vasingafungiri; ngavaburukire muguva vari vapenyu, nokuti kuipa kwakawana pokugara pakati pavo.

¹⁶Asi ini ndinodana kuna Mwari, uye Jehovha anondiponesa.

¹⁷Madekwana, mangwanani namasikati ndinochema mukushushikana, uye iye anonzwa inzwi rangu.

¹⁸Anondidzikinura ndisina kukuvara kubva pahondo inondirwisa, kunyange zvazvo vazhinji vachindipikisa.

¹⁹Mwari, agere pachigaro choushe nokusingaperi, achavanzwa agovaninipisa, Sera ivo vanhu vasingamboshanduri nzira dzavo, uye vasingatyi Mwari.

²⁰Mumwe wangu anorova shamwari dzake; anoputsa sungano yake.

²¹Mutauro wake unotsvedzerera samafuta, asi kurwa kuri mumwoyo make; mashoko ake anopfavisa kukunda mafuta, asi minondo yakavhomorwa.

²²Kanda kufunganya kwako pana Jehovha uye iye achakusimbisa; haazombotenderi vakarurama kuti vawire pasi.

²³Asi imi, iyemi Mwari, muchaburutsira vakaipa pasi mugomba rokuora; vanhu vanokarira ropa navanyengeri havangararami hafu yamazuva avo. Asi kana ndirini, ndinovimba nemi.