Read Bhaibheri Dzvene MuChiShona Chanhasi Mapisarema 56 Bible Online

Mapisarema 56 - Bhaibheri Dzvene MuChiShona Chanhasi bible

Mapisarema 56

¹Kumutungamiri wokuimba. Namaririro e“Njiva paMiouki iri kure.” Pisarema raDhavhidhi. Rwiyo rweMikitami. Paakabatwa navaFiristia paGati. Ndinzwirei ngoni, imi Mwari, nokuti vanhu vanondidzinganisa nehasha; zuva rose vanorwa neni.

²Vavengi vangu vanondidzinganisa zuva rose; vazhinji vanorwa neni mukuzvikudza kwavo.

³Pandinenge ndotya, ndichavimba nemi.

⁴Muna Mwari, iye ane shoko randinorumbidza, muna Mwari ndinovimba; handichazotyi. Ko, munhu anofa angandiitei?

⁵Zuva rose vanomonyorora mashoko angu; vanogara vachirangana kundikuvadza.

⁶Vanorangana, vanovandira, vanocherechedza mafambiro angu, vachishuva kundiuraya.

⁷Ngavasapunyuka savasina mhaka; koromorerai ndudzi pasi mukutsamwa kwenyu imi Mwari.

⁸Nyorai kuchema kwangu; isai misodzi yangu parugwaro rwenyu, ko, hazvina kuiswa muzvinyorwa zvenyu here?

⁹Ipapo vavengi vangu vachadzokera shure pandinodanidzira kuti ndibatsirwe. Nechinhu ichi, ndichaziva kuti Mwari ari kurutivi rwangu.

¹⁰Muna Mwari, iye ane shoko randinorumbidza, muna Jehovha, ane shoko randinorumbidza,

¹¹muna Mwari ndinovimba; handichazotyi chinhu. Ko, munhu angandiitei?

¹²Ndinosungwa nemhiko kwamuri, imi Mwari; ndichakuvigirai zvipo zvangu zvokuvonga.

¹³Nokuti makandirwira parufu, uye netsoka dzangu pakugumburwa, kuti ndifambe pamberi penyu muchiedza choupenyu.