Read Bhaibheri Dzvene MuChiShona Chanhasi Mapisarema 65 Bible Online

Mapisarema 65 - Bhaibheri Dzvene MuChiShona Chanhasi bible

Mapisarema 65

¹Kumutungamiri wokuimba. Pisarema raDhavhidhi. Rwiyo. Kurumbidzwa kwakakumirirai, imi Mwari, muZioni; kwamuri mhiko dzedu dzichazadziswa.

²Haiwa, imi munonzwa munyengetero, vanhu vose vachauya kwamuri.

³Patakanga takafukidzwa nezvivi, makakanganwira kudarika kwedu.

⁴Vakaropafadzwa avo vamunosarudza navamunoswededza pedyo kuti vagare pavanze dzenyu! Takagutswa nezvinhu zvakanaka zveimba yenyu, zvetemberi yenyu tsvene.

⁵Munotipindura namabasa okururama anotyisa, imi Mwari Muponesi wedu, tariro yemigumo yepasi pose namakungwa ari kure kure,

⁶iyemi makaumba makomo nesimba renyu, makazvishongedza nesimba,

⁷iyemi makanyaradza kutinhira kwamakungwa, iko kutinhira kwamafungu aro, nokupopota kwendudzi.

⁸Vanogara kure kure vanotya zvishamiso zvenyu; uko kunobuda mambakwedza uye madekwana achipera, munodanidzira nziyo dzomufaro.

⁹Mune hanya nenyika uye munoidiridza; munoipfumisa kwazvo. Hova dzaMwari dzizere nemvura kuti dzivigire vanhu zviyo, nokuti saizvozvo ndimi makazvirayira.

¹⁰Munozadza mihoronga yacho nemvura, uye munoenzanisa mihomba yacho; munoinyorovesa nemvura inopfunha munoropafadza zvibereko zvayo.

¹¹Munoshongedza gore nekorona yezvakawanda zvenyu, uye ngoro dzenyu dzinopfachukira nezvakawanda.

¹²Uswa hwomurenje hwopfachukira; zvikomo zvakafukidzwa nomufaro.

¹³Mafuro azara namapoka emakwai, uye mipata yafukidzwa nezviyo; zvinodanidzira nomufaro uye zvinoimba.