Read Bhaibheri Dzvene MuChiShona Chanhasi Mapisarema 66 Bible Online

Mapisarema 66 - Bhaibheri Dzvene MuChiShona Chanhasi bible

Mapisarema 66

¹Kumutungamiri wokuimba. Rwiyo. Pisarema. Danidzirai nomufaro kuna Mwari, imi nyika yose!

²Imbirai mukurumbira wezita rake; murumbidze zvikuru kukudzwa kwake!

³Muti kuna Mwari, “Mabasa enyu anotyisa sei! Simba renyu iguru zvokuti vavengi venyu vanodedera pamberi penyu.

⁴Nyika yose inokukotamirai; vanokuimbirai nziyo dzokurumbidza, vanoimba nziyo dzokurumbidza zita renyu.” Sera

⁵Uyai muone zvaitwa naMwari, mabasa ake anotyisa sei pakati pavanhu!

⁶Akashandura gungwa rikava nyika yakaoma, vakafamba nomumvura zhinji netsoka dzavo, uyai, ngatifarei maari.

⁷Anotonga nokusingaperi nesimba rake, meso ake anocherechedza ndudzi, vanomumukira ngavarege kumisidzana naye. Sera

⁸Rumbidzai Mwari wedu, imi vanhu, inzwi rokurumbidzwa kwake ngarinzwike;

⁹iye akachengetedza upenyu hwedu netsoka dzedu kuti dzirege kutedzemuka.

¹⁰Nokuti imi, iyemi Mwari, makatiedza; mukatinatsa sesirivha.

¹¹Makatipinza mutorongo mukatitakudza mitoro pamisana yedu.

¹²Makabvumira vanhu kukwira pamisoro yedu; takapinda mumoto nomumvura, asi makatiisa kunzvimbo ine zvakawanda.

¹³Ndichauya nezvibayiro zvinopiswa kutemberi yenyu, ndigozadzisa mhiko dzangu kwamuri,

¹⁴mhiko dzandakavimbisa nemiromo yangu, uye muromo wangu wakataura pandakanga ndiri munhamo.

¹⁵Ndichakubayirai mhuka dzakakora nechipiriso chamakondobwe; ndichabayirawo hando nembudzi. Sera

¹⁶Uyai munzwe, imi mose munotya Mwari; ndikuudzei zvaakandiitira.

¹⁷Ndakachema kwaari nomuromo wangu; rumbidzo yake yaiva parurimi rwangu.

¹⁸Dai ndakanga ndaviga chivi mumwoyo mangu, Ishe aidai asina kundinzwa;

¹⁹asi zvirokwazvo Mwari akateerera akanzwa inzwi rangu mumunyengetero.

²⁰Mwari ngaarumbidzwe, iye asina kuramba munyengetero wangu. Kana kudzivisa rudo rwake kwandiri!