Read Bhaibheri Dzvene MuChiShona Chanhasi Mapisarema 69 Bible Online

Mapisarema 69 - Bhaibheri Dzvene MuChiShona Chanhasi bible

Mapisarema 69

¹Kumutungamiri wokuimba namaimbirwo a“Maruva eMahapa.” Pisarema raDhavhidhi. Ndiponesei, imi Mwari, nokuti mvura zhinji yakwira kusvikira pamutsipa wangu.

²Ndinonyura munhope yakadzika, pasina pangatsika makumbo angu. Ndapinda mumvura yakadzika; ndafukidzwa namafashamu.

³Ndaneta nokuridza mhere yokuti ndibatsirwe; huro dzangu dzaoma, meso angu aneta nokumirira Mwari wangu.

⁴Vanondivenga ndisina mhosva vakawanda kupfuura bvudzi romusoro wangu; vanondivenga ndisina mhosva vazhinji, avo vanotsvaka kundiparadza. Ndinomanikidzwa kudzosera zvandisina kuba.

⁵Munoziva upenzi hwangu, imi Mwari; mhaka yangu haina kuvanzika kwamuri.

⁶Vaya vane tariro mamuri ngavarege kunyadziswa nokuda kwangu, haiwa Ishe, Jehovha Wamasimba Ose; vanokutsvakai ngavarege kunyadziswa nokuda kwangu, haiwa Mwari waIsraeri.

⁷Nokuti ndinotsunga kusekwa hangu nokuda kwenyu, uye nyadzi dzafukidza chiso changu.

⁸Ndiri mutorwa kuhama dzangu, nomweni kuvanakomana vamai vangu;

⁹nokuti kushingairira imba yenyu kwandipedza, uye kutuka kwaavo vanokutukai kunowira pamusoro pangu.

¹⁰Pandinochema uye ndichitsanya, ndinofanira kushinga pakusekwa;

¹¹pandinofuka nguo dzamasaga, vanhu vanondiita shumo.

¹²Vaya vanogara pasuo vanondiseka, uye ndiri rwiyo rwezvidhakwa.

¹³Asi ndinonyengetera kwamuri, imi Mwari, panguva inokufadzai; murudo rwenyu rukuru, imi Mwari, ndipindurei noruponeso rwenyu rwechokwadi.

¹⁴Ndinunurei mumatope, musandirega ndichinyura; ndirwirei kuna vanondivenga, napamvura zhinji yakadzika.

¹⁵Musatendera mvura yamafashamu kuti indifukidze, kana kwakadzika kuti kundimedze kana kuti gomba rizarure muromo waro pamusoro pangu.

¹⁶Ndipindurei, imi Jehovha, zvichibva pakunaka kworudo rwenyu; dzokerai henyu kwandiri nokuda kwetsitsi dzenyu huru.

¹⁷Regai kuvanzira muranda wenyu chiso chenyu; ndipindurei nokukurumidza, nokuti ndava mudambudziko.

¹⁸Swederai pedyo mundinunure; ndidzikinurei nokuda kwavavengi vangu.

¹⁹Munoziva kusekwa kwangu, kunyadziswa nokusakudzwa kwangu; vavengi vangu vose vari pamberi penyu.

²⁰Kusekwa kwaputsa mwoyo wangu, uye kwandisiya ndisisina chingandibatsira; Ndakatsvaka vangandinzwira ngoni, asi ndakavashaya, vangandinyaradza, asi ndakavashayazve.

²¹Vakaisa nduru mune zvokudya zvangu, uye vakandipa vhiniga pandaiva nenyota.

²²Tafura yagadzirwa pamberi pavo ngaive musungo; ngaive shamhu yokuranga neriva.

²³Meso avo ngaapofumadzwe kuti varege kuona, uye misana yavo iminame nokusingaperi.

²⁴Dururirai hasha dzenyu pamusoro pavo; kutsamwa kwenyu kunotyisa ngakuvakurire.

²⁵Nzvimbo yavo ngaisiyiwe; ngaparege kuva nomunhu anogara mumatende avo.

²⁶Nokuti vanotambudza vaya vamakarova, uye vanotaura pamusoro pokurwadziwa kwavakakuvadzwa nemi.

²⁷Vapei mhosva pamusoro pemhosva; ngavarege kuva nomugove woruponeso rwenyu.

²⁸Ngavadzimwe mubhuku roupenyu, uye varege kuverengwa pamwe chete navakarurama.

²⁹Ndiri pakurwadziwa nenhamo; ruponeso rwenyu imi Mwari, ngarundidzivirire.

³⁰Ndicharumbidza zita raMwari norwiyo, uye ndichamukudza nokuvonga.

³¹Izvi zvichafadza Jehovha kukunda nzombe, kupfuura hando nenyanga dzayo, namahwanda ayo.

³²Varombo vachazviona uye vachafara, imi vanotsvaka Mwari, mwoyo yenyu ngairarame!

³³Jehovha anonzwa vanoshayiwa uye haashori vanhu vake vakatapwa.

³⁴Denga nenyika ngazvimurumbidze, makungwa nezvose zvinofamba, imomo,

³⁵nokuti Mwari achaponesa Zioni agovakazve maguta aJudha. Ipapo vanhu vachagarako, vagoritora;

³⁶Vana vavaranda vake vacharipiwa senhaka, uye avo vanoda zita rake vachagara ikoko.