Read Bhaibheri Dzvene MuChiShona Chanhasi Mapisarema 72 Bible Online

Mapisarema 72 - Bhaibheri Dzvene MuChiShona Chanhasi bible

Mapisarema 72

¹Pisarema raSoromoni. Shongedzai Mambo nokururamisira kwenyu, imi Mwari, mwanakomana wamambo nokururama kwenyu.

²Achatonga vanhu venyu nokururama, navanonetswa venyu nokururamisira.

³Makomo achavigira vanhu kubudirira, nezvikomo, chibereko chokururama.

⁴Achadzivirira vanonetswa pakati pavanhu, uye achaponesa vana vavanoshayiwa; achapwanya mudzvinyiriri.

⁵Achashinga sokuvapo kwezuva, sokuvapo kwomwedzi, kusvikira kumarudzi ose anotevera,

⁶achafanana nemvura inonaya pamunda une uswa hwakachekererwa, seguti rinonyorovesa nyika.

⁷Pamazuva ake vakarurama vachakura zvakanaka; kubudirira kuchawanda kusvikira mwedzi waguma.

⁸Achatonga kubva kugungwa kusvikira kugungwa, uye kubva paRwizi kusvikira kumagumo enyika.

⁹Marudzi omugwenga achapfugama pamberi pake, uye vavengi vake vachananzva guruva.

¹⁰Madzimambo eTashishi navari kumahombekombe ari kure vachamuvigira mutero; madzimambo eShebha neSebha vachamupa zvipo.

¹¹Madzimambo ose achamupfugamira uye ndudzi dzose dzichamushandira.

¹²Nokuti acharwira vanoshayiwa vanodanidzira; vanonetswa vasina anovabatsira.

¹³Achanzwira ngoni vasina simba navanoshayiwa, uye achaponesa vanoshayiwa kubva parufu.

¹⁴Achavanunura pakudzvinyirirwa nokuitirwa zvinhu nechisimba, nokuti ropa ravo rinokosha pamberi pake.

¹⁵Iye ngaararame upenyu hurefu! Goridhe rinobva kuShebha ngaripiwe kwaari. Vanhu ngavarambe vachimunyengeterera uye vamuropafadze zuva rose.

¹⁶Zviyo ngazviwande munyika yose; ngazvizengaire pamusoro pezvikomo. Zvibereko zvazvo ngazvikure zvakanaka seRebhanoni; ngazvibukire sebundo romusango.

¹⁷Zita rake ngarigare nokusingaperi; ngarirambe riripo sokuvapo kwezuva. Ndudzi dzose dzicharopafadzwa kubudikidza naye, uye vachamuti, ano mufaro.

¹⁸Jehovha Mwari ngaarumbidzwe, Mwari waIsraeri, iye oga anoita mabasa anoshamisa.

¹⁹Zita rake rinobwinya ngarirumbidzwe nokusingaperi; nyika yose ngaizadzwe nokubwinya kwake. Ameni naAmeni.

²⁰Ndipo panoperera minyengetero yaDhavhidhi, mwanakomana waJese.