Read Bhaibheri Dzvene MuChiShona Chanhasi Mapisarema 73 Bible Online

Mapisarema 73 - Bhaibheri Dzvene MuChiShona Chanhasi bible

Mapisarema 73

¹Pisarema raAsafi. Zvirokwazvo Mwari akanaka kuna Israeri, kuna avo vakachena pamwoyo.

²Asi kana ndirini, tsoka dzangu dzakapotsa dzatsvedza; ndakasara paduku kupunzika.

³Nokuti ndakaitira shanje vanozvikudza, pandakaona kubudirira kwavakaipa.

⁴Havatambudziki; miviri yavo ino utano uye vakasimba.

⁵Vakasununguka pamitoro inowanikwa muvanhu; havatambudzwi nezvinotambudza vanhu.

⁶Naizvozvo kuzvikudza ndiko ruketani rwemitsipa yavo; vanozvishongedza nechisimba.

⁷Mumwoyo yavo makasindimara munobuda chitadzo; mifungo yakaipa yendangariro dzavo haina magumo.

⁸Vanoseka, uye vanotaura noutsinye mukuzvikudza kwavo, vanoti vachadzvinyirira vamwe.

⁹Miromo yavo inoti denga nderavo, uye ndimi dzavo dzinotora nyika.

¹⁰Naizvozvo vanhu vavo vanodzokera kwavari, uye vanonwa mvura yakawanda.

¹¹Vanoti, “Mwari angazviziva sei? Ko, Wokumusoro-soro ane ruzivo here?”

¹²Ndizvo zvakaita vakaipa, havana hanya nguva dzose, vanowedzera pfuma yavo.

¹³Zvirokwazvo ndakanatsa mwoyo wangu, asi pasina; ndakashamba maoko angu ndisina mhosva, asi pasina.

¹⁴Zuva rose ndanga ndichitambudzwa; ndinorangwa mangwanani ose.

¹⁵Dai ndakanga ndati, “Ndichataura zvakadai,” ndingadai ndakapandukira vana venyu.

¹⁶Pandakaedza kunzwisisa izvi zvose, zvakandiremera kwazvo

¹⁷kusvikira ndapinda munzvimbo tsvene yaMwari; ipapo ndikazonzwisisa magumo avo.

¹⁸Zvirokwazvo makavaisa munzira inotsvedza; makavakanda pasi kuti vaparare.

¹⁹Haiwa, vanoparadzwa kamwe kamwe, vanopedzwa chose nezvinotyisa!

²⁰Sezvakaita kurota panopepuka munhu, saizvozvo pamunomuka, imi Ishe, muchavashora savanhu vanorotomoka.

²¹Mwoyo wangu pawakachema uye mweya wangu ukashungurudzika,

²²ndakanga ndava benzi uye ndisingazivi; ndakanga ndava mhuka inotyisa pamberi penyu.

²³Kunyange zvakadaro ndinogara nemi nguva dzose; munondibata noruoko rwenyu rworudyi.

²⁴Munondisesedza nezano renyu, uye pashure muchazonditora mondipinza mukubwinya kwenyu.

²⁵Ndianiko wandinaye kudenga kana musirimi? Uye nyika haina chandinoshuva kunze kwenyu.

²⁶Nyama yangu nomwoyo wangu zvingapera hazvo, asi Mwari isimba romwoyo wangu nomugove wangu nokusingaperi.

²⁷Avo vari kure nemi vachaparara; munoparadza vose vasina kutendeka kwamuri.

²⁸Asi kana ndirini, zvakanaka kuva pedyo naMwari. Ndakaita Ishe Jehovha utiziro hwangu; ndichataura zvamabasa enyu ose.